Lodoselo, capital dos coidados na Limia

"Aquí tratamos de facer posíbel o que é necesario", afirma Antonio Corbal, voceiro e un dos impulsores do Centro de Desenvolvemento Rural (CDR) O Viso, con sede en Lodoselo, Sarreaus, pero con influencia en toda a comarca da Limia. "O que marca a nosa actuación é unha boa análise da realidade para dar resposta ás necesidades da veciñanza", que van en aumento. "Cada vez hai menos xente e máis envellecida", destaca Corbal, á que facilitan que poidan continuar co seu plan de vida na súa vivenda, na súa contorna e sen sentirse totalmente soas. "Hai familias que o que fan é organizarlles a vida fóra, querendo o mellor para os seus, pero nós dámoslle a volta e preguntámoslles: 'Como queres estar e ser coidado? E moitos queren estar na súa casa". Se precisan o xantar cociñado, poden acollerse ao servizo de comida ao domicilio que atinxe máis dun cento de persoas. Se precisan acompañamento para ir ao médico ou permanecer no hospital, terán unha persoas de apoio. Carmen Bohorques é quen asume a maior parte destas viaxes e estancias, quen escoita e sostén a man daquelas persoas que non teñen familia ou familiares perto. "Acompañamos, coidamos e tamén choramos con eles, ás veces somos nós quen lles damos o último adeus e ás veces quen as acompañamos de volta á casa". Non se trata só de coidar, senón de estar presentes. "Acompañar tamén é ir tomar algo ao bar, ir á feira o día que a hai, visitalas nas súa casa, convidalas a un paseo, trátase de facer do ordinario algo extraordinario", destaca Corbal. O Viso avoga por facer no rural o que sempre se fixo: "Coidarnos os uns aos outros". Comunidade activa Ademais do persoal de cociña, acompañamento e vivenda -o CDR xestiona unha casa comunitaria na que viven 12 persoas-, "intentamos que participen de todos os programas e coñezan o traballo dos compañeiros". "O bo disto que facemos nós é que procuramos meter a comunidade nos coidados, poñer en contacto a veciñanza e facer que uns estean pendentes dos outros, un enfoque que desenvolvemos noutros programas", explica Antonio Corbal. O obxectivo, conclúe, é lograr que sexa a comunidade quen se sinta responsábel dos coidados que precisa. "Se unha persoa precisa axuda co control da medicación, que alguén estea aí; que un día vemos que outra non subiu as persianas, ir ver que pasa. É nos detalles pequenos onde se observa a boa veciñanza". E é o ánimo que o vindeiro 14 de setembro celebrará a Asociación Irimia en Lodoselo, na edición 46 da Romaxe de crentes galegas baixo o lema 'A terra quer coidados', unha homenaxe á iniciativa limiá.