60 persoas internadas no sanatorio La Robleda, no concello do Pino, tiveron que ser desaloxadas despois de que se rexistrase un incendio nunha das habitacións a primeira hora da madrugada.
Outros dous residentes e dúas persoas traballadoras do centro sanitario tiveron que ser trasladadas ao Hospital Clínico de Santiago (CHUS) por senllos episodios de inhalación de fume, aínda que o seu estado non era de gravidade.
Precisamente, os dous internos que tiveron que ser derivados ao CHUS atopábanse nas habitacións anexas ao cuarto no que se orixinou o lume. Pola súa parte, o residente desta puido saír polo seu propio pé.
Até o sanatorio desprazáronse os bombeiros de Arzúa, que apagaron rapidamente o lume e procederon a ventilar o edificio, un labor que aínda desenvolven a esta hora.
Segundo incendio en dous meses
É a segunda vez que este complexo sanitario, especializado en pacientes psiquiátricos, sofre un incendio destas características. O anterior decorreu no pasado mes de agosto, cando outra habitación comezou a arder.
Segundo trasladaron os efectivos de emerxencias, as chamas afectaron só o cuarto no que se orixinaron, pero o fume ateigou a primeira e a segunda planta.
Os efectivos tamén sinalaron que os danos humanos terían sido moito peores se o fume tivese chegado á terceira planta, onde se atopan os pacientes con dependencia de mobilidade.