Os servizos de emerxencia traballan na extinción dun industrial iniciado á primeira hora da mañá no Polígono do Ceao, en Lugo. As chamas comezaron na nave dunha empresa de pinturas pero acabou por afectar a outras instalacións lindeiras.
Segundo fontes do 112 Galicia, a magnitude do lume obrigou a baleirar de combustíbel unha gasolineira da zona. Ademais, a voracidade das lapas obrigou á Xunta a activar o Plan Territorial de Emerxencias de Galicia (Platerga) no seu nivel 1, o que implica o desprazamento de diferentes recursos do ámbito local e supralocal.
#AXEGAInforma de que está activo un incendio industrial no Polígono do Ceao, en #Lugo, orixinado nunha nave de pinturas na Avenida da Industria. Interveñen: #BombeirosLugo, #BombeirosVilalba, #PolicíaLocal, @policia, #ProtecciónCivil e servizos sanitarios. pic.twitter.com/JRcV256WK7
— 112Galicia (@112Galicia) April 11, 2021![Publicidade 196050]()
Así, desde as 6:40 horas da mañá traballan na extinción do incendio bombeiros de Lugo e de Vilalba ademias de varias motobombas do persoal contra incendios forestais de Monterroso, Becerreá e Chantada.
Até o lugar tamén se desprazou un grupo de apoio loxístico da Axencia Galega de Emerxencias (Axega), cun camión bomba para abastecer de auga ao resto de efectivos; así como membros de Protección Civil e da Policía Local e Nacional.
Segundo detallou o 112 Galicia, de momento non hai constancia de que se producisen danos persoais. O lume calcinou a zona de almacenaxe da firma de pinturas e afectou, tamén, ás rotativas dun xornal e ás instalacións dunha empresa de pneumáticos.
Os servizos de extinción continúan traballando no lugar, onde o fume negro xerado polo lume segue a ser visíbel a varios quilómetros de distancia. Porén, desde o 112 veñen de confirmar que o incendio está controlado.
