O #VenresNegro9 supuxo, ademais, a ampliación da táboa reivindicativa das traballadoras e traballadores do ente público. “Hoxe engadimos ás nosas reivindicacións a importancia da información local, eixe da nosa programación”, sinala a conta de twitter @DefendeAGalega, “e que contribúe á pluralidade de voces. Non podemos abandonar esta responsabilidade”.
A dirección da Radio Galega anunciou ao comité intercentros o pasado mes de maio que suprimiría as desconexións locais dos informativas. Foi na mesma xuntanza en que comunicou á representación do persoal a eliminación do Diario Cultural no formato en que se emitiu ao longo de 28 anos.
“Esiximos a reapertura das delegacións de Pontevedra, Ferrol e A Mariña e o reforzamento das delegacións en funcionamentos”, sinala a mesma conta -que se define como “conta dos traballadores e traballadoras dos medios públicos galegos en defensa da TVG e da Radio Galega”-, “os informativos locais teñen que seguir sendo unha parte importante das grellas”.
O twitter volveu encherse de profesionais dos medios públicos galegos vestidos de negro contra a manipulación informativa e as retalladas.
