A Conferencia Episcopal española anunciou nun comunicado que a Igrexa se someterá a unha auditoría independente para investigar os casos de abusos sexuais a menores ocorridos no seo da institución.
A encargada de levar a cabo esta auditoría independente será a firma legal Cremades & Calvo Sotelo. O seu presidente, Javier Cremades, e o presidente da Conferencia Episcopal española, o cardenal Juan José Omella, darán a coñecer os detalles desta investigación.
Entre as tarefas que levará a cabo o despacho de avogados estará recibir eventuais denuncias e revisar os procedementos xurídicos tendentes a sancionar as prácticas delitivas.
Asemade, Cremades & Calvo Sotelo colaborará coas autoridades para axudar a esclarecer os feitos que tiveron lugar no seo da Igrexa española, así como establecer un sistema de prevención que satisfaga as demandas sociais.
Investigacións internas
Non é a primeira vez que a Igrexa organiza investigacións internas para dilucidar a veracidade das denuncias sobre abusos sexuais. O pasado 13 de febreiro, o colexio La Salle de Santiago de Compostela anunciou a apertura dunha investigación interna para esclarecer as denuncias por abusos e agresións sexuais ás crianzas matriculadas.
Varios ex alumnos do colexio La Salle de Compostela declararon que durante a súa estancia no centro, na década de 1980, foron vítimas de abusos sexuais por parte dun profesor e mais dun cura, falecido hai anos.
O director do colexio, Jesús Martín, asinou un comunicado dirixido ás nais e pais dos alumnos no que asegura que iniciaron o proceso para recompilar “toda a información posíbel”, após o Bloque Nacionalista Galego de Compostela exixira unha investigación sobre as denuncias por abusos e agresións sexuais no colexio La Salle da cidade, á que se sumou o alcalde, Xosé Sánchez Bugallo.
Cos datos obtidos por medio de entrevistas “a persoas que poidan achegar datos relevantes sobre o caso”, Martín subliñou que nelas recollerán o ocorrido “con independencia de que os feitos prescribisen legalmente ou de que o presunto agresor falecese”.
