A busca de determinantes xenéticos e biomarcadores xenómicos de risco que poidan predispor a unha persoa a sufrir unha infección a causa do coronavirus máis grave, ou que mesmo poidan causar a morte en persoas aparentemente sen factores de risco asociado, é o principal obxectivo da investigación dirixida polo catedrático da Universidade de Santiago de Compostela, responsábel do grupo de Medicina Xenómica e director da Fundación Pública Galega de Medicina Xenómica do Sergas, Ángel Carracedo, investigador do Centro de Investigación en Medicina Molecular e Enfermidades Crónicas da USC.
"Os datos clínicos, é dicir, signos, síntomas e achados, así como os antecedentes persoais e epidemiolóxicos recolleranse nunha base de datos común xa deseñada para este proxecto", explica Ángel Carracedo. "Atoparemos así determinantes xenéticos/xenómicos de risco e mala evolución que permitan unha mellor estratificación das pacientes e a adecuación e optimización de protocolos terapéuticos", engade.
Xunto a Carracedo, coordinará este proxecto internacional o director científico do Centro de Investigación Biomédica en Rede de Enfermidades Raras, Pablo Lapunzina. Máis de vinte hospitais, así como grupos de investigación de alto nivel, conforman este consorcio que acometerá, ademais, a busca de biomarcadores xenómicos de risco ou protección en pacientes que teñan recibido tratamento durante a infección e que evolucionaran de maneira dispar.
Un ano para estudar 8.000 pacientes
Este proxecto estudará a 8.000 pacientes con infección polo coronavirus, o SARS-CoV-2, que teñan un test microbiolóxico positivo, tanto do Estado como doutros países do mundo. Concretamente, centrarase en 7.000 pacientes de España e outros 1.000 de países latinoamericanos, cunha maior mestura xenética.
O consorcio desenvolverá un estudo de asociación de xenoma completo (GWAS) na mostra de 7.000 pacientes españois e un estudo de secuenciación de xenoma completo en 300 pacientes seleccionados. O GWAS realizarase no Centro Nacional de Xenotipado na Fundación Pública Galega de Medicina Xenómica, que depende do Sergas, e dirixe o propio Carracedo.
O Instituto de Saúde Carlos III financiará a este consorcio, que tamén coa axuda da Fundación Amancio Ortega. Dede o Centro de Investigación Biomédica en Rede coordinarán a investigación, que está previsto que remate en un ano.
Na súa execución intervirán investigadoras de Compostela, Vigo, Lugo, A Coruña, Santander, Madrid, Bilbao, Valladolid, Segovia, Granada, Barcelona, León, Soria, Burgos, Sevilla, Lleida e Tenerife, así como de varios países de Latinoamérica e Europa como Arxentina, Uruguai, Brasil, México, Colombia e Reino Unido.
