Os Gobernos da Galiza, Castela e León, Asturies e Cantabria acordaron acudir ao Tribunal Supremo no caso de que o Executivo español siga adiante co seu proxecto de protexer o lobo e prohibir o seu caza no conxunto do Estado.
Así o explicaron tras o encontro desenvolto esta terza feira no Centro para a Defensa Contra o Lume en León no que tomaron parte varios conselleiros destes territorios. O representante de Castela e León, como anfitrión deste encontro, foi o primeiro en tomar a palabra e puxo de manifesto o risco que pode supoñer que "entre en vigor a orde ministerial o próximo 25 de setembro para as provincias lobeiras" e defendeu o encontro coa fin de "renovar o compromiso coa gandería, as localidades e o medio rural".
Así mesmo, reiterou que "se pide algo sinxelo de entender como é unha mesa de traballo e a retirada do proxecto de orde ministerial" e avisou que "non se pode poñer no Boletín Oficial do Estado (BOE) e logo querer falar". Nesta liña, criticou "a sucesión de actos atropelados" e reivindicou "unha xestión estatal aprobada en 2005 na que sempre houbo consenso no ámbito da biodiversidade e que non se pode tomar ningunha decisión sen modificar esta estratexia".
Estas catro comunidades se non hai unha retirada do proxecto para mediados de xuño pedirán medidas cautelarisimas ao Tribunal Supremo
Reclamou a necesidade de "actualizar o censo do lobo, que falta por facelo" e pediu ao Goberno español que "a estratexia teña consenso e se avance de abaixo a arriba e non á inversa".
Retirada do proxecto
No caso de que o Goberno de España non vaia nesta liña avanzou que "estas catro comunidades se non hai unha retirada do proxecto para mediados de xuño e unha chamada ao diálogo coordinarán os seus censos para desenvolver un a nivel estatal e elaborarán o seu propio texto de estratexia de forma construtiva e eficaz". Por último, reiterou que "pedirán medidas cautelarisimas ao Tribunal Supremo" no caso de que siga adiante e puxo de manifesto que "con iso deféndese o territorio e a gandería extensiva como medio para a pervivencia do medio rural".
A responsábel de Medio Ambiente da Xunta da Galiza, Ángeles Vázquez, seguiu na mesma liña e demandou "diálogo, a retirada da orde ministerial e empatía" porque, ao seu xuízo, "non se pode protexer en exceso unha especie en prexuízo doutras". Así mesmo, destacou que "todas as comunidades contan cun plan de xestión, no caso de Galiza desde 2009" e engadiu que desde 2015 incrementáronse as mandas de lobos, o que provocou que "aumentasen os ataques e os danos aos gandeiros".
Para facer fronte a iso, sinalou que "é necesaria a coordinación co Goberno español" e solicitou a posta en marcha "dunha mesa na que participen as Comunidades Autónomas e as organizacións agrarias para decidir se o lobo debe formar parte da lista de especies protexidas ou non".
Tamén, reiterou que "o lobo non é unha especie ameazada" e salientou e a necesidade de "ter unha resposta económica porque non pode ser que sexa eu quen convido e o resto sexan os que pagan".
