O ministro de Inclusión, Seguridade Social e Migracións, José Luis Escrivá, defendeu esta cuarta feira que a "medida máis eficaz" para garantir a sustentabilidade do sistema de pensións é "a prolongación da vida laboral", retrasando a idade de xubilación.
Escrivá lembrou que a reforma das pensións aprobada polo Partido Socialista (PSOE) en 2011 xa elevou a idade de xubilación de forma progresiva até 2027, cando se estabelecerá nos 67 anos.
Neste sentido, afirmou que o Executivo está a traballar en achegar a idade efectiva de xubilación á idade real e defendeu a necesidade de incentivar a xubilación demorada.
O ministro criticou a "cultura da xubilación anticipada" adoptada nas empresas, xa que se trata de "unha forma de pasar os custos á Seguridade Social" e estabelece "esquemas moi agresivos".
"Cambios internos" nas empresas
Escrivá pediu "cambios internos" para cambiar esa tendencia e fomentar "fórmulas de prolongación" da vida laboral. Sinalou que o Estado español é un dos países de Europa cunha taxa de actividade máis baixa a partir dos 55 anos.
O titular da Seguridade Social tamén criticou a reforma das pensións do 2013, acometida polo Partido Popular, por carecer de acordo cos axentes sociais e non pasar tampouco polo Pacto de Toledo.
"Non tivo practicamente percorrido e xerounos un problema. Houbo que acudir á Unión Europea e dicirlles que había que aplicar un novo marco", subliñou.
