O Boletín Oficial do Estado publica hoxe a Orde TMA/277/2020, do 23 de marzo, do Ministerio de Transportes, Mobilidade e Axenda Urbana, pola que se declaran servizos esenciais a determinados aloxamentos turísticos e adóptanse disposicións complementarias.
A Orde recolle unha listaxe de aloxamentos turísticos que se manterán pechados ao público en xeral, pero deben permitir o aloxamento daquelas traballadoras que realicen labores de mantemento, asistencia sanitaria, reparación e obras, subministración e transporte de servizos esenciais.
Entre as traballadoras cuxo aloxamento se posibilita atópase as de mantemento, asistencia sanitaria, reparación e execución de obras de interese xeral, abastecemento de produtos agrarios e pesqueiros, e tripulacións dos buques pesqueiros, así como servizos complementarios ás mesmas, no ámbito sanitario, portuario, aeroportuario, viario e ferroviario, alimentario, salvamento e seguridade marítimo.
Devandita listaxe comprende un total de 370 aloxamentos turísticos repartidos por todo o territorio do Estado español, mais na Galiza son exactamente 37, repartidos do seguinte modo:
-4 en Compostela, Vigo e Sanxenxo.
-3 na Coruña
-2 en Ordes (denominado “Orbes” no BOE), Ferrol, Boiro e Poio-Pontevedra
-1 en Xinzo, Verín, Ourense, Muíños, Manzaneda, Viveiro, Foz e Oleiros.
O obxectivo desta medida é “asegurar a prestación dos servizos esenciais de empresas e provedores necesarios para o abastecemento da poboación e do mantemento dos propios servizos esenciais”. Ademais, preténdese “evitar os efectos negativos sobre o emprego e a viabilidade empresarial derivados da suspensión de contratos públicos, e o seu impacto estrutural negativo sobre esta parte do tecido produtivo”.