Axentes da Garda Civil procederon na mañá desta cuarta feira, 21 de xuño, á detención de Iria C., Ugío C. e Afonso L, militantes de Ceivar, nun operativo ordenado pola Audiencia Nacional. Segundo a versión do Ministerio do Interior, as tres persoas detidas "dirixían un entramado de enaltecimiento e xustificación" do terrorismo de Resistencia Galega". Unha acusación que tería como principal argumento, segundo fontes consultadas polo Sermos, o acto de recebemento que o pasado 14 de maio se realizou en Compostela ao preso independentista Antom Santos. Porén, o Ministerio afirma que os arrestos son continuidade da Operación Jaro, desenvolvida en 2015 e na que se detivo 9 independentistas de Causa Galiza. Os axentes procederon ao rexistro dalgunhas das vivendas dos detidos.
As detencións producíronse en Compostela, Vilaboa e Ourense e as persoas detidas son trasladadas á Comandancia da Garda Civil de Compostela. Os detidos foron ficando en liberdade a primeira hora da tarde.
Desde Causa Galiza denuncian nun comunicado o que consideran máis un capítulo “na persecución e criminalización do independentismo galego” . Agora Galiza pide a liberdade inmediata das persoas detidas. Desde Galiza Nova consideran que as detencións procuran "desprestixiar o independentismo e o nacionalismo, ao mesmo tempo que se crea unha situación de alarma entre o pobo galego". Briga, tamén nun comunicado, sostén que este operativo demostra que "no Estado espanhol o compromisso, a solidariedade, o ativismo social e cultural, a responsabilidade e o amor coletivo nom som valores a preservar mas a perseguir e condenar".
Concentracións
Ceivar convocou para esta tarde concentracións en varias vilas e cidades galegas.
20:30 horas. Compostela. Praza de Cervantes
20:30 horas. A Coruña. Obelisco
20:30 horas. Vigo. Marco
20:30. Ourense. Praza do Ferro
20:30 horas. Burela. Praza do Concello
20:00 horas. Pontevedra. Praza da Peregrina
20:00 horas. Praza do Reló. A Guarda.
20:30 horas. Lugo. Praza Maior.