Segundo os datos publicados na mañá da sexta feira pola Consellaría de Sanidade con rexistros até as 18 horas da quinta feira, seguen 10 persoas diagnosticadas con Covid-19 ingresadas en UCI e aumentan a 32 as ingresadas noutras unidades -catro máis-, mentres que 547 pacientes atópanse en seguimento no seu domicilio.
Por áreas sanitarias, a presión hospitalaria aumenta nas de Vigo, que segue sen paciente Covid en UCI e rexistra seis noutras unidades de hospitalización -dous máis- e A Coruña e Cee, que mantén catro en críticos e conta con 11 noutras unidades -dous máis-.
As outras cinco áreas sanitarias continúan sen cambios con respecto á xornada anterior. Deste xeito, na de Ourense segue un paciente Covid en UCI e outro en planta; e na de Santiago e Barbanza mantense un en críticos e sete noutras unidades.
A de Lugo segue con tres pacientes Covid en UCI e catro noutras unidades; a de Pontevedra e O Salnés, cun en críticos e dous noutras unidades; e a de Ferrol cun único ingresado en planta por este coronavirus.
Menos de 600 casos
A Galiza afronta o comezo desta ponte de outubro, o primeiro con Galiza en niveis de 'nova normalidade', con tendencia descendente dos casos activos que caen até os 589, que implican 31 menos que os rexistrados a xornada anterior, ao haber máis altas (64) que contaxios (33).
Por áreas sanitarias, as infeccións activas aumentan lixeiramente unicamente na da Coruña e Cee (+1), mentres que descenden nas outras seis coa de Pontevedra e O Salnés á cabeza (-8), seguida da de Lugo (-7), Vigo (-7), Santiago e Barbanza (-5), Ferrol (-4) e Ourense (-1).
Por iso, con máis casos activos de Covid-19 segue a área da Coruña e Cee, con 161; seguida da de Ourense, con 112; Vigo, con 110; mentres que con menos dun centenar mantéñense a de Lugo, con 92; Santiago e Barbanza, con 63; Pontevedra e O Salnés, con 44; e Ferrol, con oito.
Segundo os datos publicados polo Ministerio de Sanidad na tarde desta quinta feira, a incidencia da Galiza a 14 días redúcese a 19,02 casos por 100.000 habitantes.
Contaxios sen cambios
Os novos contaxios de Covid-19 mantéñense por terceiro día consecutivo na trintena, con 33, os mesmos que a xornada anterior, fronte aos 31 da cuarta, após comezar esta semana con 28 e descender a 24 a terza.
De novo os 33 positivos foron detectados por proba de infección activa nas últimas 24 horas, 14 deles na área da Coruña e Cee; sete, na de Vigo; cinco, na de Ourense; outro cinco, na de Lugo; un na de Santiago e Barbanza; e outro, na de Pontevedra e O Salnés, mentres que na de Ferrol non se rexistrou ningún.
En canto á taxa de positividade das probas PCR -número de infeccións detectadas cada 100 test- descendeu a un 0,98 e segue por baixo do 5% que a OMS determina como limiar para considerar controlada a pandemia.
As persoas falecidas diagnosticadas con Covid-19 desde o inicio desta pandemia en toda a Galiza mantéñense en 2.640 ao non notificar na quinta feira a Consellaría de Sanidade novas vítimas.