O físico e meteorólogo da Axencia Estatal de Meteoroloxía (Aemet) Juan Jesús González Alemán adiantou na mañá deste domingo que a probabilidade de que o furacán Danielle chegue á Galiza é cada vez o escenario máis probábel, aínda que xa convertido en borrasca.
Ahora los modelos empiezan a confirmar que el escenario de acercamiento a la península se convierte en el más probable!
— J. J. González Alemán (@glezjuanje) September 4, 2022
Aunque existe baja probabilidad de que tenga un alto impacto, ya en forma de borrasca.
Como he venido insistiendo, nunca hubo que descartar un acercamiento. pic.twitter.com/2ZzOB17vow
“Agora os modelos comezan a confirmar que o escenario de achegamento á península convértese no máis probábel!”, indica González Alemán nun chío, para despois engadir que “existe baixa probabilidade de que teña un alto impacto”.
O National Hurricane Center (HNC) confirmou ás 4.36 horas que Danielle, que se convertera nunha depresión tropical durante a xornada do sábado, recuperou a categoría de furacán, após fortalecerse no medio do océano Atlántico, onde agora mesmo se atopa “serpeando”.
Pola súa parte, o European Centre for Medium-Range Weather Forecasts (ECMWF) “estima unha probabilidade entre 10% e 20% de que Danielle se aproxime a menos de 120 quilómetros á costa galega nos vindeiros 10 días”, subliñou o tamén meteorólogo de Aemet Ernesto Barrera.
Debilitación de Danielle
O National Hurricane Center (HNC) informou no día de onte que Danielle volvía ser considerada unha tormenta tropical, no canto dun furacán, despois de que se rexistrase unha debilitación. Malia isto, o HNC matizaba que, tal e como xa sucedeu, volveríase fortalecer, recuperando a súa condición de furacán.
González Alemán, un dos máis reputados especialistas neste tipo de fenómenos, explicaba que, se ben a debilitación tivo lugar “por cuestións descoñecidas”, os servizos de control meteorolóxico sospeitan que o seu causante foi “un proceso físico relacionado coa súa interacción co océano”.
Barrera explicou na súa conta de Twitter que os fortes ventos da cicloxénese desprazaron a auga quente que había no centro de Danielle cara ao exterior da tormenta, deixando así as augas máis frías nese centro. Este fenómeno, coñecido como afloramento frío autoinducido, é o que estaría a provocar esta debilitación temporal da depresión tropical.
“Nas ultimas 12 horas, o furacán Danielle permaneceu practicamente estacionario cun sistema de altas presións limitando o seu avance”, detallou Barrera.