Os froitos de temporada que están por vir

Verduras A horta vive un auténtico esplendor na temporada estival co aumento das horas de sol e de calor. O primeiro que se dará na nosa horta será a leituga. A partir de abril e até finais do outono poderemos desfrutar dela, aliñada cun pouco de aceite e vinagre ou en ensaladas máis elaboradas. Un mes máis tarde, canda maio, chegan as primeiras cenorias e danse até o outono. A cenoria cómese ao vapor, cocida e até crúa sendo unha das hortalizas máis consumidas. No mesmo mes que comezan a saír as cenorias, tamén recolleremos os primeiros chícharos. Este legume é moi versátil, con el poderemos facer purés ou cremas, gornicións para carne ou peixe e incluso botarllos a ensaladas ou arroces, como o da coñecida canción. Un prato que me encanta e que me recorda moito aos longos veráns de cando era cativo son os chícharos con xamón, detestaba debullalos cando viñan da horta pero esa aversión logo se me quitaba á hora de comelos. Cocidos, con xamón e cun rustrido de allo e pemento picante están estupendos, pero se ademais diso lles engadimos uns ovos escalfados por enriba xa son insuperábeis. A partir de xuño e até a chegada de setembro poderemos recoller a maioría dos froitos: feixóns verdes, cabaciñas, berenxenas, pementos, cebolas, tomates… As cabaciñas cocíñanse en cremas, con ovos (en tortillas, revoltos, ou quiches) ou tamén recheas de carne. Eu vouvos propor dúas receitas menos coñecidas e espero que vos sorprendan. A primeira delas é empregar a cabaciña como substituta da pasta, facendo tallaríns ou espaguetes con ela para logo saltealos nunha tixola e finalmente integralos co mollo que máis nos guste, por exemplo, unha salsa boloñesa. A segunda é comela crúa, cortándoa en láminas finas e aderezándoa cunha vinagreta. Deste modo teremos un delicioso carpaccio de cabaciña ao que lle poderemos engadir se queremos unhas lascas de queixo San Simón por enriba. As berenxenas, a diferenza das cabaciñas, non é recomendábel comelas crúas pois poden ser indixestas As berenxenas, a diferenza das cabaciñas, non é recomendábel comelas crúas pois poden ser indixestas, pero temos moitos outros modos nos que desfrutar delas cociñadas. Un exemplo é o baba ganoush, unha crema árabe semellante ao hummus e que substitúe os garavanzos cocidos pola berenxena asada. É ideal como aperitivo ou entrante mollando nel pedaciños de cenoria ou pan. As berenxenas con carne tamén están moi boas, recheas como as cabaciñas ou por exemplo nunha musaka. É unha elaboración exquisita de orixe grego, similar á lasaña pero emprega láminas de berenxena en lugar da pasta e pode levar pataca en toros na base. A escalibada é un prato típico catalán que leva berenxena, ademais de cebola e pementos. Ásanse as verduras e unha vez frías pélanse e córtanse en tiras, podendo comelas co mollo que soltaron directamente ou aliñadas cun pouco de aceite de oliva e sal. Adoita acompañarse con pan, e tamén con anchoas ou queixo. Tanto os tomates, como os pementos e as cebola están presentes en case todas as comidas, desde un rustrido que serve de base para todo até na tortilla, para min sempre con cebola. Unha receita que vos recomendo, con tomate e fresquiña para o verán é o salmorejo, unha crema orixinaria de Córdoba que se fai con tomate, auga, allo e pan. Tritúrase ben todo e emulsiónase cun pouco de aceite. Como aperitivo ou como primeiro prato, con xamón ou ovo cocido por enriba é unha delicia para os días de calor. Froitas Ademais das verduras, hai unha enorme variedade de froitas que comezan a saír co inicio do verán. As máis temperás son os amorodos e as cereixas e a partir de xuño xa podemos desfrutar delas. Outras como as framboesas, os pexegos ou ameixas non estarán listas até xullo ou agosto. Se estades aborrecidos de comer sempre os amorodos con nata, recoméndovos dúas alternativas moi sinxelas. Unha é cortalos en anacos como se fósemos mesturalos coa nata pero no canto diso engadirlles un pouco de leite, azucre e canela. É unha combinación refrescante e ben saborosa. A outra é cortalos en láminas e botarlles un pouco de azucre e un chorriño de vinagre por enriba. Temos que deixalos repousar un pouco antes de comelos para que maceren e se forme un almibre, doce pero con toques acedos e que resulta moi apetitoso. Hai milleiros de tortas que podemos preparar con froitas Hai milleiros de tortas que podemos preparar con froitas. Unha das máis famosas nos Estados Unidos de América é a torta de cereixa, elabórase cunha base de masa crebada e un recheo feito con cereixas asadas no seu almibre. Outra torta moi sinxela e moi boa é a de amorodos con nata e chocolate. Leva varias capas de biscoito e entre elas amorodos en anacos, marmelada de amorodo e nata. Finalmente cóbrese por enriba con máis nata e chocolate. Se queremos aproveitar a froita para que non se perda, ademais das tortas, facer marmelada é moi boa opción. Deste modo poderemos conservala durante varios meses sen problema. Todas estas froitas e verduras podemos atopalas a maior parte do ano importadas doutras rexións mais, en todas elas e especialmente no caso dos tomates, o sabor e a textura que teñen aqueles que maduraron ao sol e non foron transportados en cámaras frigoríficas a miles de quilómetros é imposíbel de superar. Por iso vos animo a que gocedes dos produtos de temporada e de proximidade, gañando en sabor e en calidade e ademais reducindo a pegada de carbono. Imos sacarlle o máximo partido ás froitas e verduras deste verán!