A Fiscalía de Nafarroa amosa o seu desacordo ca sentenza de nove anos de prisión para cada un dos membros de ‘La Manada’ por abuso sexual e cre que "son constitutivas de delito de agresión sexual", de violación, e non só de abuso sexual, polo que vai recorrer a decisión da Audiencia Provincial.
Nun comunicado indicou que, unha vez estudada a sentenza ditada pola sala segunda da Audiencia Provincial de Nafarroa na que se condena os cinco acusados como autores dun delito de abuso sexual e condenados a nove anos, vai recorrer en apelación perante a Sala Civil e Penal do Tribunal Superior de Xustiza de Navarra.
O recurso será presentado nos vindeiros días segundo anunciou a Fiscalía, que remarca que mantén a súa consideración inicial de que é un caso de agresión sexual. No xuízo, solicitou máis de 22 anos de prisión para cada un dos acusados e o pagamento dunha compensación conxunta de 100.000 euros.
