Un home de 69 anos de idade que estaba ingresado no CHUF de Ferrol é a vítima número 20 do coronavirus na Galiza.Tiña patoloxías previas. Este falecemento súmase ao do varón de 81 anos de idade que estaba ingresado no Hospital Lucus Augusti falecido a primeira hora desta segunda feira. Tamén presentaba patoloxías previas.
Durante a xornada do domingo faleceron en Galiza cinco persoas en relación á epidemia de COVID-19, entre elas dúas mulleres de 92 e 77 anos de idade na área de Ferrol, a primeira ingresada no Complexo Hospitalario Universitario de Ferrol (CHUF) e a segunda no Hospital Juan Cardona. Ambas as dúas presentaban patoloxías previas.
Casos
A Dirección Xeral de Saúde Pública da Consellería de Sanidade informa que, na última actualización, esta segunda feira, día 23, o número de casos de coronavirus en Galiza ascende a 1170. Deses casos, 298 corresponden á área da Coruña; 278 á de Vigo; 189 á de Santiago; 164 á de Pontevedra; 142 á de Ourense; 62 á de Lugo; e 37 á de Ferrol.
Do total de pacientes positivos, 46 permanecen en UCI, 270 están en unidades de hospitalización e 854 no domicilio. Polo de agora, en Galiza rexistráronse 19 altas e 19 falecementos.
O Sergas informa que realizou case 6.000 probas na Galiza.
No Estado español, e segundo informaron esta segunda feira desde o Ministerio de Sanidade, hai 33.000 casos rexistrados de Covid-19 e a cifra de persoas falecidas é de 2.182. O dado positivo, as 3.355 altas.
