Faleceu na madrugada desta segunda feira 1 de xullo Manuel González Capón, alcalde do concello de Beade desde o ano 1987 até hai tres días, cando renunciou ao bastón de mando debido a unha enfermidade.
O presidente da Xunta de Galiza, Alberto Núñez Feixoo, trasladou á familia e amizades de Capón o seu pésame e salientou os seus máis de 30 anos de traballo no PP e a prol de converter “o seu concello nun lugar mellor para os seus veciños”.
O meu máis sentido pésame á familia e amigos de Manuel González Capón, compañeiro do @populares que durante máis de 30 anos traballou desde a alcaldía de Baralla para converter o seu concello nun lugar mellor para os seus veciños. Descanse en paz
— Alberto Núñez Feijóo (@FeijooGalicia) 1 de xullo de 2019
Durante 32 anos ocupou a alcaldía gañando eleccións tras eleccións para o Partido Popular, incluída a do pasado 26 de maio, obtendo maioría absoluta fronte as dúas actas conseguidas polo PSdeG e unha polo Bloque Nacionalista Galego. A súa renuncia fíxose efectiva a pasada sexta feira nun “pleno rápido e emotivo” segundo trasladou o número tres da lista do PP e fillo do propio ex rexedor, Miguel González. O pleno estivo marcado ademais pola imposibilidade de Capón para asistir debido á enfermidade.
Durante 32 anos ocupou a alcaldía gañando eleccións tras eleccións para o Partido Popular
González Capón sitiou Baralla no mapa político galego como bastión incombustíbel do Partido Popular gañando maiorías absolutísimas. Mais tamén saltou á palestra pública polas súas polémicas declaracións sobre as persoas fusiladas polo franquismo cando nun pleno decorrido en 2013 o BNG denunciou a represión franquista e o alcalde afirmou que “os que foron condenados a morte será porque o merecían”.
A oposición pedira a súa demisión, mais ducias de veciñas e veciños saíron no seu apoio no seguinte pleno celebrado tamén en agosto de 2013 ao berro de "viva o alcalde" e o propio Capón rexeitou presentar a súa demisión. "Dixen iso", afirmou en relación ás súas declaracións, "e reitéroo". Porén, deu lectura a un comunicado onde dicía que "errar é de humanos e rectificar é de sabios".
“Os que foron condenados a morte será porque o merecían”, afirmou Capón nun pleno en relación ás vitimas do franquismo
En decembro de 2017 voltou saír á palestra nun pleno en que se debatían os orzamentos municipais. Nunha emenda, o edil do BNG Xosé Manuel Becerra solicitou destinar unha partida de 15.000 euros para axudar a veciñanza que tivera nacementos ou adopcións no municipio. Capón respostou que "as capas sociais máis baixas son as que teñen os nenos" a quen despois “non coidan” e afirmou que “os xitanos, sen desprecialos, dálles igual ter seis que sete" e "se puidesen, canda tres meses nacería un".
O propio fillo do ex alcalde, Miguel Capón, soa como posíbel candidato a suceder o seu pai
O propio fillo do ex alcalde, Miguel Capón, soa como posíbel candidato a suceder o seu pai no bastón de mando. Esta segunda feira ás 21,00 horas rezarase un rosario no tanatorio de Baralla o funeral será a terza ás 18,00 horas na igrexa de Baralla.