Coincidindo co período ordinario de novas matrículas –de 1 a 20 de marzo– a Plataforma galega en defensa do ensino público vai iniciar unha campaña de fomento das matriculacións nos centros educativos públicos de Galiza baixo o lema “Faite do ensino público”.
A campaña centrarase nos propios centros educativos, nas ANPAs e no tecido asociativo do país. A Plataforma chama igualmente aos concellos a sensibilizar a pais e nais das vantaxes que ofrece o ensino público e a promover un ensino público e de calidade.
O ensino público galego escolariza no presente curso escolar a 70% do total do alumnado de Educación Infantil, Educación Primaria, fronte a 28% dos centros concertados e 2% de centros privados sen concerto. No caso da ESO as cifras son similares (79%-27%-3%). No caso do Bacharelato son de 82% na rede pública e 18% na rede privada.
Estas porcentaxes mantéñense desde hai máis dunha década malia, indica a Plataforma, que se teña producido un incremento importante de unidades concertadas en centros privados e unha redución de aulas públicas.
