Fai turismo ornitolóxico este verán pola Galiza

Pasado mañá comeza oficialmente o verán, parece que a situación sanitaria vai permitir viaxar, e xa estamos a pensar en opcións para as vacacións. Propoñemos algunhas ideas para gozar das férias en compañía das aves. Turismo de observación de aves O turismo ornitolóxico está en auxe, nos últimos tempos cada vez son máis as persoas que están interesadas en viaxar para ver certas especies de aves ou cando menos empregar unha parte dos seus días de ocio nesta ocupación. Existen de feito xa opcións de contratar viaxes a axencias especializadas nesta modalidade de turismo. Outra posibilidade é organizalo pola nosa conta. As dúas maneiras teñen pros e contras, nas viaxes organizadas acompañadas de guías locais ou persoas expertas, seguramente observaremos maior cantidade de especies que doutra maneira pasaríansenos desapercibidas. Porén, facendoo pola nosa conta teremos oportunidade ir ao noso aire. As dúas son válidas en función das expectativas. Turismo ornitolóxico e Galiza Se decidimos pasar os nosos días de lecer no país, temos moi boas opcións. A páxina web da Xunta de Galiza dedicada ao Turismo ornitolóxico pode darnos algunhas pistas de por onde tirar. En Turgalicia, en Que facer, imos á lapela de Natureza e alí xa atopamos Galicia Birding, anglicismo que fai referencia ao acto de observar aves ou paxarear. Unha vez nesa sección comezamos a navegar; en Cando ver aves, podemos mes a mes, de xaneiro a decembro, saber que aves imos poder atopar. No apartado Onde ver aves, propóñense rutas por diferentes ambientes; a montaña, as agras, a beira do mar, etc. Tamén é ben interesante Os mellores lugares, que percorre espazos senlleiros para ver aves como a Costa da Morte, Canóns do Sil ou os Humidais da Terra Cha, por poñer tres exemplos. Fálase das aves de cada un deles, así como de posíbeis rutas e algúns consellos específicos para cada un dos lugares. Con excelentes fotografías e moita información é un fantástico portal dende o que achegarse para coñecer a avifauna presente en Galiza. A Deputación de Pontevedra tamén ten unha sección dedicada ao Turismo de aves na súa páxina de internet. Esta provincia acolle a Reserva Ornitolóxica de SEO/BirdLife de Galiza, no concello do Grove, que presume de ser a maior do estado español e a única que conta con medio mariño. Na seguinte ligazón da citada entidade, e editada coa colaboración de SEO/Birdlife, pódense descargar dúas guías; Guía das aves do litoral da provincia de Pontevedra e Guía das aves do interior da provincia de Pontevedra, que teñen un dobre obxectivo; gozar das aves a través do Turismo ornitolóxico e ao tempo sensibilizar á poboación sobre a necesidade de conservar o patrimonio natural de cara ó futuro. Dúas propostas para a observación de aves mariñas Galiza ten unha situación privilexiada para a observación de aves mariñas e peláxicas. Unha proposta fabulosa para o verán, que no noso país pódese practicar dende terra ou saíndo en barco. Dende a costa, un dos mellores cabos de Europa, si, dixemos ben, de Europa, é Estaca de Bares, no concello de Mañón. Neste espazo da costa galega xúntanse cada ano unha boa cantidade de ornitólogos galegos e de Europa, e amantes das aves en xeral, para facer o seguimento e gozar do paso das aves mariñas. Na seguinte ligazón pódese botar un ollo á páxina web dedicada ao estudio da migración de aves de Estaca de Bares. E falando de Estaca de Bares, unha lectura recomendada é a obra de Antonio Sandoval, Las aves marinas de Estaca de Bares. Un diario personal, editado por Tundra, na que o autor coruñés narra as súas vivencias ornitolóxicas e persoais neste cabo ao tempo que nos fala das aves mariñas que por alí pasan. Un bo libro para o verán que de seguro animará a achegarse á zona. Outra opción para observar aves mariñas é facer unha saída peláxica en barco, se somos de saír ó mar. Desde o ano 2011, e capitaneados por Isidro, patrón do Chasula, organízanse viaxes para a observación de aves mariñas e cetáceos. Acompañados dun guía ornitolóxico que proporciona información sobre as aves a mamíferos mariños avistados o barco Chasula é tamén un excelente lugar para a fotografía das aves mariñas. Como indican no seu website o barco sae desde O Grove, e percorre a ribeira sur da ría de Arousa, acadando a punta sur da illa de Sálvora. Logo, navegan cara ao oeste até a liña das doce millas náuticas desde o litoral, preto do canón de Arousa. A volta faise despois de xantar, viaxando cara oeste do arquipélago de Ons e voltando xa para o Grove. Código ético Demos xa algunhas posibilidades referidas ao onde e ao cando ver aves, mesmo lugares concretos que visitar, porén quizais o máis imporante é como realizar o turismo ornitolóxico. A observación de aves pode ser unha modalidade de turismo que axude á economía de zonas rurais e ao tempo contribúa a conservación do patrimonio natural e cultural das mesmas. Porén, tamén pode acabar converténdose nunha ameaza para certas especies, motivo polo cal existen protocolos e códigos éticos para realizar as visitas dunha maneira responsábel. Un dos problemas que pode xerar o turismo ornitolóxico son as molestias que se lles poida ocasionar ás aves, en especial nas colonias e na época de cría, que pode levar a que abandonen o niño ou aos polos. Por este motivo é sempre moi importante gardar unha boa distancia de seguridade para así evitar provocar estrés aos paxaros observados. Tamén a tentación de conseguir unha boa foto que traer de recordo á volta da viaxe ou colgar nas redes sociais, é outra práctica que poder levar a situacións inadecuadas. Non se debe acosar as aves para conseguir unha boa imaxe e nunca molestar aves no seu niño. Hai que pensar que ademais de nós, haberá outras moitas persoas que tentarán tomar esa mesma foto, e unha conducta reiterada de molestia pode levar ao abandono do niño, o que sumado a outras parellas reprodutoras, pode acabar repercutindo negativamente na conservación de certas especies.