Todos os indicadores da Covid melloran na Galiza, mais con lixeiras variacións que indican estabilidade da situación epidemiolóxica.
As infeccións activas non alcanzan as 9.500. A respecto da xornada anteiror o Sergas notifica, 294 casos menos. Os novos contaxiso tamén diminúen e roldan o medio milleiro. A presión hospitalaria descende e resta tres pacientes ingresados.
Así, segundo os datos feitos públicos esta quinta feira pola Consellaría de Sanidade nas últimas 24 horas rexistráronse 498 novos positivos por coronavirus, a maior parte nas áreas sanitarias de Santiago e Lugo.
Así, os distritos de Santiago e O Barbanza anotaron 107 casos nas últimas 24 horas, seguida moi de preto polos de Lugo, A MAriña e Monforte, con 102 infeccións novas. A área da Coruña sumou 99 contaxios novos; Vigo, 75; Ourense, 42; Pontevedra, 38, e a de Ferrol, 35.
Casos activos
As infeccións activas mantéñense por baixo da barreira dos 10.000. Sitúanse en 9.486. Por áreas sanitarias, a da Coruña encabeza a baixada, con 184 infeccións activas menos, até quedar con 2.609, a cifra máis alta. Vigo rexistra 107 casos activos menos e queda con 2.073; Pontevedra, 33 menos e suma 795 infeccións en total; Ferrol anota 24 casos menos e queda con 696, e Ourense resta seis e mantén 688 casos.
Santiago e Lugo, son as únicas áreas nas que soben as infeccións activas, sumando 25 e 35 casos activos, respectivamente. Así, Santiago mantén 1.248 casos e Lugo, 1.377.
Presión hospitalaria e incidencia
Os datos publicados por Sanidade reflicten unha tendencia á baixa na presión hospitalaria, con 274 ingresados. Así, pese ao incremento de pacientes en UCI, catro máis nas últimas 24 horas -59 en total-, o cómputo global rexistra tres hospitalizados menos ao saír das plantas convencionais sete pacientes até os 215 que permanecen en unidades Covid.
A presión hospitalaria e a evolución dos pacientes nas unidades de coidados intensivos segue a ser unha prioridade para as autoridades sanitarias que, de momento, tampouco perden de vista a incidencia acumulada nos diferentes territorios.
Segue a ser desigual, con alzas en Lugo e Santiago. Porén, no conxunto da Galiza a incidencia baixa mais sen grandes avances. A sete días sitúase en 144 casos por 100.000 habitantes mentres que a 14 días alcanza os 306 casos.
Falecementos
Desde o inicio da pandemia faleceron 2.552 persoas con Covid. Os dous últimos decesos notificados corresponden a dúas mulleres maiores de 80 anos.