A manifestación convocada por Galegas 8-M logra reunir en Verín o feminismo galego, con máis de 5.000 asistentes segundo fontes da propia organización, nunha xornada de protesta que precede ao propio Día da Muller Traballadora. Ascenderon a 26 os autobuses que se desprazaron até a comarca de Monterrei, para alén das persoas que empregaron os seus propios medios, para converter a vila na "capital do feminismo galego".
Aquí están as Feministas!#FeministasGalegas #Verin1M #FeminismoGalego #Feminismoenpé #SenCoidadosNonHaiVida #DerrubandooPatriarcado pic.twitter.com/luQ2Y7iMni
— Galegas 8M (@Galegas8M) March 1, 2020
As 50 organizacións que aglutinan Galegas 8M demostran de novo a súa vontade de "descentralizar" o movemento feminista para levalo a todos os puntos da Galiza. Así, o ano pasado a manifestación unitaria tiña tamén lugar en Lugo.
A escolla de Verín, "símbolo de loita de colectivos, organizacións e veciñanza", especialmente despois de conseguir que o goberno de Feixoo recuase a súa decisión e restaurase o servizo do paridoiro do hospital, non se debe só á oposición á violencia obstétrica que a vila protagonizou nos últimos meses. A organización manifestou a súa intención tamén de reivindicar o rural e as mulleres que o manteñen, enlazando co tema escollido en 2019. Os coidados son, xunto á custodia do territorio e as alternativas de consumo, os eixos fundamentais da mobilización unitaria en 2020.
Invisíbeis e precarias. Pola valorización dos traballos de coidados. #1MVouAVerín #SenCoidadosNonHaiVida #Galegas8M #CamiñoDo8M pic.twitter.com/okTLI4PoAw
— CIG (@galizaCIG) March 1, 2020
Foron moitos os colectivos que se sumaron á manifestación. Entre eles, podía verse un tractor en representación do Sindicato Labrego, engalanados coas proclamas “desbrozando o patriarcado” e “se as labregas non plantan, a cidade non xanta”.
Por #Verín con @Galegas8M. Desta vez, vimos preparadas para desbrozar machismo e patriarcado. 🚜💪🏽✊🏼#1MVouAVerin. #SenCoidadosNonHaiVida #Camiñodo8M #Labregas #DesbrozandoMachismo #DesbrozandoPatriarcado pic.twitter.com/izbFxq4LbJ
— Sindicato Labrego (@SLG_labregxs) March 1, 2020
Este lema encaixa á perfección coa reivindicación da plataforma, “sen coidados non hai vida”, que pretende estender isto ás relacións coa natureza apostando e visivilizando o labor da mulleres rurais, das alternativas de consumo e da xestión do territorio.
A praza maior de Verín, onde a manifestación puxo fin, vibrou coa consigna “Feijoo, escoita, Verín está en loita”, á agarda da lectura do manifesto.
Colectivizar os coidados
O texto denunciou, seguindo a liña da convocatoria, que o "patriarcado e o sistema capitalista" lle asignaron ás mulleres "as tarefas de coidado", xerando "un mundo público masculino desvinculado dos tempos biolóxicos e ecolóxicos". Por iso, apelaron a unha "corresponsabilidade" na que quer homes a nivel individual quer os servizos públicos de maneira xeral compartan ese labor e dean a opción a que elas se incorporen á esfera pública.
Neste senso, demandaron á Administración que se involucre para colectivizar os coidados e atender, en especial, as necesidades das mulleres do rural. Igualmente, defenderon, seguindo a expresión popularizada por Susan Sontag, que tanto o territorio como o seu propio corpo son "campos de batalla" fundamentais para o movemento feminista.
A mobilización de Verín dá inicio a unha semana que estará ateigada de actos reivindicativos e divulgativos, que concluirán coas manifestacións do propio Día da Muller Traballadora, o 8 de marzo.