Até 18.000 toneladas anuais de aceite usado sen tratar queima a planta de fabricación de celulosa de Ence en Pontevedra para obter combustíbel. Así o denunciou esta sexta feira en Pontevedra a Asociación pola Defensa da Ría.
O aceite usado está declarado como residuo tóxico e perigoso pola Unión Europea e a normativa española dende 1998. En 2006 prohibiuse no estado o vertido deste residuo sobre os solos e as augas superficiais e subterráneas, esixindo o seu tratamento superficial antes da súa utilización como combustíbel. Porén, segundo denunciaron desde a APDR no Estado “tense permitido a utilización de aceite usado como combustíbel sen realizar un tratamento térmico previo, t al e como recoñeceu un estudo técnico encargado polo Ministerio de Agricultura, Alimentación e Medio Ambiente en 2011”.
“Ence fornecése deste produto contaminante para o seu uso como combustíbel a través de varios xestores de residuos industriais no Estado español, Portugal e países de África”, sinala a APDR.
Así, desde a entidade pontevedresa sinalan que “os tratamentos que se teñen esixido e que se teñen realizado do aceite usado, limítanse a procesos de eliminación de augas e sedimentos, sen a eliminación de metais pesados e outros compostos contaminantes que se atopan neste residuo e que saen ao medio na súa combustión”.
Para a APDR “Ence fornecése deste produto contaminante para o seu uso como combustíbel a través de varios xestores de residuos industriais no Estado español, Portugal e países de África”.
O cambio normativo nas esixencias da utilización do aceite usado como combustíbel conta cunha moratoria até 2020
Sinalan ademais que o uso do aceite usado tería xerado a Ence un aforro superior aos 3,5 millóns de euros anuais nos últimos cinco anos. “A comezos do ano 2018, o goberno do Estado aprobou a orde que estabelecía requisitos para que o aceite usado recuperado e tratado puidera ser comercializado como combustíbel ás plantas industriais”, recordaron desde a APDR, e sinalaron que precisamente nesta orde “especifícase un procedemento de tratamento máis rigoroso e uns valores límite de contaminantes presentes tanto no aceite como nas emisións industriais producidas pola súa combustión, incluíndo as partículas contaminantes da queima de metais pesados”.
Mais con todo, a pesar deste cambio nas esixencias da utilización do aceite usado como combustíbel, a orde incluíu unha moratoria de dous anos, até 2020, para adaptarse.
A asociación ambientalista denuinciou na rolda de prensa desta quinta feira que precisamente esta moratoria é empregada por Ence para continuar utilizando o aceite usado sen contar con medidas para tratar os gases xerados na combustión dos residuos, a pesar de coñecer os efectos prexudiciais que pode provocar sobre o medio e a saúde humana.
Este procedemento "choca directamente cos compromisos ambientais e de seguridade e saúde das persoas que ENCE estabelece nas súas Memorias anuais”, denuncian desde Defensa da Ría
Este procedemento "choca directamente cos compromisos ambientais e de seguridade e saúde das persoas que Ence estabelece nas súas Memorias anuais” e que declara aos seus accionistas e inversores como empresa cotizada nos mercados”, denunciaron desde APDR. Incidiron ademais en que a queima de aceites, tanto usados como non usados, na planta de Ence está expresamente prohibida pola Autorización Ambiental Integrada (AAI) revisada no ano 2018, “o que supón motivo abondo para a súa anulación”, remarcaron.