Un xulgado de Santiago de Compostela vén de avalar que o persoal de psiquiatría que tratan un paciente ingresado no Hospital do Conxo por un cadro psicótico lle apliquen terapia electroconvulsiva (TEC), unha cuestión á que se opón a familia do novo, alegando que presenta un "risco elevadísimo" de suicidio, segundo os informes médicos e forenses realizados, e que todos os tratamentos previos fallaron.
O caso, dado a coñecer polo diario El Correo Gallego, refírese a un mozo de 30 anos, orixinario de Arzúa, que permanece ingresado desde inicios de febreiro en Psiquiatría de Conxo tras ser atendido por un cadro psicótico.
Dada a situación psiquiátrica do novo, avaliada polos psiquiatras no hospital, e ante o "altísimo risco para a súa vida" que supón a "grave patoloxía" que padece, recolle un auto emitido polo xulgado número 6, determinouse o seu ingreso xudicial no Hospital de Conxo, así como que se lle aplique un tratamento de electroshock. A familia do mozo manifestou a súa oposición a este tratamento e o seu desexo de que o paciente sexa dado de alta.
Con todo, no auto, o xuíz chama a atención sobre que o mozo padece unha "patoloxía grave" que supón un perigo para a súa propia vida, dado que persiste "sintomatoloxía psicótica activa", e que, a maiores, non é "consciente do seu trastorno mental e da necesidade do tratamento pautado", polo que se atopa "imposibilitado" para "decidir no momento actual".
O xuíz, que se basea nos informes de psiquiatría do hospital, así como nunha avaliación forense e nun recoñecemento xudicial do novo, estabelece que existe "un risco grave e inminente para a integridade física do paciente de ser autorizada a súa alta hospitalaria e o seu traslado ao centro proposto polo proxenitor", que é "manifestamente inadecuado de maneira obxectiva para o tratamento que precisa".
Sobre o tratamento proposto polo seu psiquiatra, o auto recolle que, desde o ingreso, tentáronse, sen éxito, "cinco tratamentos orais alternativos" e que os especialistas consideran esta opción está "absolutamente xustificada".
Ademais, subliña que, nos seus recursos ás decisións xudiciais, o pai do mozo "limítase a oporse ao TEC, sendo evidente a falta de conciencia suficiente da gravidade e entidade da enfermidade e trastorno mental" do seu fillo e cualificando a súa decisión de "manifestamente contraria á integridade física e mental do paciente".