A consellaría de Educación vén de entregar nestes días a proposta de vacantes a cubrir con carácter definitivo no Concurso de translados dos corpos docentes. Segundo os datos facilitados pola xefatura territorial da Coruña, o departamento que dirixe Jesús Vázquez pretende eliminar 330 postos de traballo fixos ocupados até agora por funcionari@s.
Aínda que a información "chegou tarde e é incompleta", o sindicato CIG, con presenza maioritaria no Ensino, bota contas e advirte de que "é de supoñer que o criterio de redución e as cifras serán semellantes en Lugo, Ourense e Pontevedra". Por tanto, en todo o País o PP destruirá pola volta máis un milleiro de empregos fixos no ensino público, e veñen sumarse aos máis de 2 mil 500 que foron eliminados durante a pasada lexislatura.
Insiste CIG-Ensino en que a redución ou amortización de postos fixos "ten unha repercusión directa na calidade educativa", para alén de incidir na masificación das aulas, nomeadamente no rural, e no incremento das ratios en todos os niveis do ensino. "As primeiras mostras" da política educativa do PP após as eleccións do 21-O confirman que "seguirán os recortes na pública namentres se manteñen todos os fondos destinados á concertada".