A Xunta notificou ao Ministerio de Agricultura un novo caso de 'vacas tolas' na Galiza --encefalopatía esponxiforme bovina, da variante atípica, cepa tipo H--. En concreto, trátase dun bovino de 22 anos nunha granxa da Estrada.
Segundo informa a Consellaría do Medio Rural nun comunicado, supón un caso illado "sen transcendencia para a saúde pública ou a sanidade animal", un animal bovino de raza de conxunto mestizo pertencente a unha explotación de carne.
O animal morreu na granxa e o seu cadáver foi trasladado ao centro de destrución de cadáveres autorizado, onde previamente tomouse mostra para o seu diagnóstico. "O bovino non entrou, por tanto, na cadea alimentaria, polo que non existiu ningún risco directo nin indirecto para a saúde pública", asegura o Goberno galego.
O último caso declarado na Galiza de encefalopatía esponxiforme bovina atípica foi no ano 2019, unha vaca de máis de 18 anos nunha explotación do concello de Ortigueira.
Así, a mostra do animal da Estrada foi enviada desde Laboratorio de Sanidade e Produción Animal da Galiza ao Laboratorio Nacional de Referencia das EET, en Algete (Madrid), que confirmou o resultado positivo. Conforme ao programa oficial de vixilancia desta enfermidade, os servizos veterinarios realizaron a correspondente investigación epidemiolóxica, na que se comprobou que non existían outros animais vivos que compartisen ningún risco co animal afectado, "polo que non é posible a aparición de novos casos vinculados a este foco, que por tanto considérase como resolvido". "Tampouco fai falta adoptar outras medidas sanitarias preventivas", agrega.
"A forma atípica de encefalopatía esponxiforme corresponde con formas naturais e esporádicas desta enfermidade que aparecen en todas as poboacións bovinas nunha taxa moi baixa. Estes casos, que se desenvolven de forma natural e sen vinculación co consumo de pensos contaminados nin outras causas coñecidas, detéctanse como resultado dunha vixilancia reforzada das encefalopatías esponxiformes transmisibles", explica a Xunta.
Esta enfermidade continúa sendo obxecto de vixilancia no marco do programa nacional plurianual de control e erradicación da encefalopatía esponxiforme bovina, que permitiu outorgar ao Estado español, desde o ano 2016, o status de país de risco insignificante da aparición desta patoloxía. "A existencia deste caso non afecta o mantemento deste estatuto", aclara Medio Rural.
O prion é o axente infeccioso que causou a epidemia de enfermidade das vacas tolas, tamén chamada encefalopatía esponxiforme bovina (EEB), que estalou na Galiza no ano 2000. A inxesta de pensos de orixe animal por parte dos bóvidos estaba detrás desta transmisión.
Pola súa banda, a transmisión da EEB aos humanos, como a través do consumo de alimentos derivados de vacas infectadas, produce a enfermidade de Creutzfeldt-Jakob que se caracteriza por unha progresiva e invariablemente letal descomposición das células cerebrais.
Tras o primeiro caso -detectado en novembro do 2000- en Carballedo de vacas tolas en territorio estatal, unha alerta sanitaria que tivo a súa orixe anos antes no Reino Unido, sacrificáronse miles de reses na Galiza. Ao terminar ese ano produciuse en Mesía un polémico enterramento masivo
Na Galiza, apareceron 315 focos con 324 casos.
