Persoal do Colexio Cardeal Cisneros de Ourense deu a voz de alarma esta cuarte feira e mobilizou as Emerxencias do 112 tras comprobar como se estaba asolagando o patio do centro, dado que desde fóra entraba unha gran cantidade de auga.
As primeiras hipóteses, aínda que os bombeiros seguen traballando no lugar, apuntan que puido ser a rotura dunha tubaxe a que provocou a acumulación de auga no patio do centro, localizado na Rúa de Emilia Pardo Bazán, aínda que houbo outros puntos afectados no interior e, debido á presión, derrubouse un dos muros do exterior.
Fontes do 112 explicaron que se esborrallaron "uns 15 metros" dun muro que ten grandes dimensións por mor da auga.
Tras a alerta mobilizáronse efectivos dos bombeiros, que continúan os seus labores no lugar, e tamén á Policía Local.
Sen feridos
Fontes ratificaron que non houbo feridos, aínda que tanto o alumnado como o persoal do centro tiveron que marchar. A inundación provocou "certas dificultades", aínda que finalmente todos puideron irse "sen problemas".
Na zona producíronse importantes retencións de tráfico e, por mor do derrube do muro, que delimitaba o patio do centro coa rúa e vivendas lindeiras, os bombeiros tamén tiveron que axudar esta tarde a unha veciña que tiña dificultades precisamente para abandonar o seu fogar.
Xácome apunta á Xunta
O alcalde de Ourense, Gonzalo Pérez Xácome, manifestouse no seu perfil de Twitter por mor do ocorrido e apuntou á Xunta, quen lembrou o carácter privado do centro.
