As asociacións sinalan, en nota de prensa, que a Xunta designa "a dedo" a representación das entidades de carácter naturalista e ecoloxista no seo do Comité Galego de Caza, “no canto de deixar que estas elixan as súas representacións tal e como indica a lei”.
Desta forma, as organizacións instan a Xunta a que “poña fin á reiterada falla de transparencia na política de caza” e tamén reclaman a avaliación ambiental e mais a participación pública para as aprobacións dos Plans de caza, tanto para os de carácter anual, de aproveitamentos cinexéticos, como para os referidos á ordenación da caza.
Ecoloxistas en Acción, Petón do Lobo e Cova Creva declaran que “é moi difícil conseguir as actas dos distintos comités, acceder aos diferentes plans de xestión das especies e aos calendarios dos campionatos de caza”.
Así mesmo, sinalan que hai plans de xestión que non están actualizados e tamén outros, como é o caso do do porco bravo, que “pese a elaborarse non se chegaron a publicar no boletín oficial correspondente”, polo que as entidades acusan un descoñecemento xeral, tanto dos censos de especies cinexéticas como da xestión proxectada desde a Xunta.
Segundo estes colectivos ecoloxistas, hai determinados procedementos que necesitan da autorización do órgano administrativo de caza e dos que nunca se chega a coñecer o seu verdadeiro alcance ambiental, pese as implicacións que estas autorizacións teñen sobre o medio e sobre os recursos cinexéticos.
As ecoloxistas pon como exemplo que non existe publicidade sobre as autorizacións de cazarías que se realizan baixo as modalidades de batida, montaría, espera e axexo e “non existe tampouco publicidade sobre os resultados cinexéticos de ditas cazarías”.
"Existe", engaden, "unha falta total de información en canto ás soltas de especies cinexéticas, e a orixe ou destino das mesmas". "Feito que pon en perigo a identidade xenética das especies na Galiza", recalcan.
Segundo denuncian, no noso país a planificación cinexética non conta coa preceptiva avaliación ambiental dos impactos da actividade sobre os ecosistemas e sobre as familias que viven no rural. Deste modo, a opacidade que rodea todos estes instrumentos de planificación cinexética incomoda a cidadanía que habita o rural ou que quere facer uso do monte no seu tempo de lecer.
Segundo informan, a Xunta “viola a Lei 21/2013 e o Convenio de Aarhus", asinado polo Estado español en 1998, "ao omitir a participación do público na toma de decisións cinexéticas”.
A lei de avaliación ambiental parte da experiencia acumulada nos 25 anos de aplicación no Estado español. “Durante este tempo, a consideración dos impactos ambientais dos proxectos, primeiro, e dos plans e programas, despois, revelouse como unha ferramenta útil para asegurar a sustentabilidade do desenvolvemento económico”.
