Un día máis, os problemas de frecuencias de horarios que acusa Renfe volveron afectar as persoas usuarias do servizo ferroviario.
Nesta quinta feira, o problema xurdiu pola demora do tren que fai o traxecto Ourense-Santiago-A Coruña entre as 19 e as 20.08 horas.
O convoi debía chegar ás 19.40 horas á capital galega. Porén, tal e como denunciou a deputada do BNG no Parlamento galego Mercedes Queixas, este chegou cun retraso de máis de 40 minutos.
“Cada día peor, Renfe. [...] Agora mesmo con billete para saír ás 19.40 sigo agardando na estación e anuncian saída para as 20.24”, denunciaba Queixas na súa conta de Twitter.
A demora obriga a retrasar outro tren
A demora deste convoi, que afectou a todas as persoas que adquiriran billete para desprazarse até a cidade herculina, trasladouse a outro tren, obrigado a retrasar a súa saída até que o primeiro tren saíse.
En concreto, tratábase doutro ferrocarril con viaxeiros que tiña por destino A Coruña, aínda que neste caso saíndo desde Vigo.
O tren, que tiña prevista a súa hora de saída desde Santiago de Compostela para as 20.17 horas, tivo que paralizar o seu traxecto até que o Ourense-A Coruña realizase a súa saída, ademais de darlle unha marxe, facendo que finalmente o convoi saíse minutos antes das 20.30 horas.
Sobre este novo episodio, a plataforma Tren Media Distancia Galicia asegurou que as persoas usuarias precisan que Renfe “mellore a fiabilidade, non hai semana que se cumpran os horarios”.
