O primeiro paciente que deu positivo por coronavirus en Galiza, un home de 49 anos procedente de Madrid, foi dado de alta da Unidade de Coidados Intensivos (UCI) do Complexo hospitalario da Coruña (CHUAC) e está ingresado en planta.
Así o informou o xefe da UCI do Hospital da Coruña, David Freire, que confirmou que na tarde do domingo deuse de alta da Unidade de Coidados Intensivos "ao primeiro paciente diagnosticado por Covid-19 na área sanitaria da Coruña e Cee" e que supuxo tamén o primeiro en Galiza.
Ademais, confirma que se trata do primeiro paciente dado de alta de UCI en Galiza en relación a esta pandemia. Após as probas practicadas e con dous negativos en senllos test realizados, atópase agora ingresado en planta.
Do seu prognóstico, confirma tamén que é "estábel". Por todo iso, o xefe da UCI no Hospital da Coruña destaca a "noticia" que supón este feito, do que afirma tamén que é "un indicio de esperanza ante esta pandemia".
Procedente de Madrid para unha entrevista de traballo
En concreto, o primeiro paciente con positivo por coronavirus en Galiza foi un home de 49 anos procedente de Madrid, que viaxou até A Coruña nun servizo de coche partillado con outra persona para unha entrevista de traballo.
O home chegou o pasado 3 de marzo ao servizo de Urxencias do Complexo Hospitalario Universitario A Coruña (Chuac) con problemas respiratorios e diagnosticáronlle pneumonía. Ante o seu estado, fíxoselle a proba do coronavirus, que se lle repetiu con posterioridade e enviouse a Madrid, confirmando a infección por coronavirus.
