Curso de horta na casa: Malas herbas na horta

Así, debemos buscar solucións para desfacernos das herbas tanto antes de cultivar como durante o cultivo. Existen diferentes métodos naturais que podemos utilizar sen necesidade de recorrer a produtos químicos como herbicidas. Arrincar as herbas coas propias mans O método principal, máis natural e ecolóxico, e que menos danará a horta, terreo e cultivos é arrincar as malas herbas coas nosas propias mans. É un traballo laborioso pero eficaz. Desta maneira evitaremos danar as propiedades do solo ou os cultivos que estean perto. Para facer un bo desherbado manual debemos arrincar as herbas de raíz, non chega con cortar a parte aérea xa que do contrario, en moi pouco tempo, teremos de novo a herba no noso horto. Auga fervendo Este é un dos mellores métodos para desfacernos das malas herbas e ademais non é para nada prexudicial para as persoas nin para o medio. Hai que quentar auga nunha pota até que chegue a ferver. Nese momento botarémolo directamente nas zonas onde queiramos desfacernos da herba. A auga fervendo acabará coas partes aéreas das plantas pero tamén coas raíces. Hai que ter moito coidado con este método xa que non é selectivo, polo que se temos cultivos ou plantas que desexemos conservar perto pódense ver afectados. Sal Esta é unha das fórmulas máis coñecidas para desfacerse das malas herbas. O sal é moi corrosivo e acaba con todas as herbas e plantas que toque, ademais fará que o terreo no que se bote sexa infértil durante moito tempo. Así pois, este método é axeitado para aplicar en pequenas zonas como, por exemplo, as beiras dun invernadoiro no que non queremos que nazan herbas porque, ao cortalas, podemos perforar o plástico do mesmo, ou ben nun camiño de pedras ou baldosas do xardín, entre as fendas dunha beirarrúa etc. Fariña de millo A fariña de millo é un dos mellores métodos para usar na horta, xa que non é corrosivo coas plantas, mais si evita que medren e xermolen as sementes. É ideal para usar despois de realizar unha plantación, pois nese momento o plantón xa está medrado e o terreo atópase limpo e libre de herbas. Se esparexemos fariña pola superficie ao redor dos cultivos esta non lle afectará para nada pero evitará que medren as sementes das malas herbas que hai no propio terreo. Cómpre asegurarse de extraer todas as raíces e malas herbas que había no terreo, bancais ou testos. Papel de periódico ou cartóns Estes métodos son ideais para utilizar en terreos xa cultivados, dado que non afectan negativamente as plantas que xa se están desenvolvendo, mais si que impide que broten novas malas herbas. Ademais, o terreo está libre de herbas grazas ao desherbado manual que realizamos antes de plantar os cultivos, polo que será o complemento perfecto para retardar a aparición de malas herbas. Para o pór en práctica debemos colocar follas de periódico ou cartóns ao redor dos cultivos por toda a superficie, asegurándonos de que non queden ocos libres. Se non queremos que se vexan podemos tapalos de novo con terra. Debemos ir repóndoos cada certo tempo xa que co regado e a humidade irán podrecendo e desfacéndose. Ao colocar o papel de periódico e os cartóns sobre a superficie do bancal ou do terreo estamos quitándolle a luz solar, polo que isto fará que as sementes e raíces das herbas que poida haber no terreo non sexan capaces de desenvolverse. Acolchado O acolchado, feito con herba seca, palla ou follas secas, é un dos mellores métodos que podemos usar na horta para evitar o crecemento de malas herbas ao redor dos cultivos, xa que ao privalas de luz solar fará que estas non sexan quen de medrar e desenvolverse. Ademais, como vimos en leccións anteriores, o acolchado é unha técnica moi positiva para a horta, pois grazas a ela conseguimos protexer o terreo dos efectos das xeadas, cambios bruscos de temperatura e axudamos a manter a humidade en épocas de menos auga. Vinagre O vinagre é outro dos métodos que poden axudar a desfacernos das malas herbas da horta, mais debemos usalo cando non haxa cultivos perto xa que, ao igual que o sal, pode facer que os cultivos ou plantas que estean preto murchen e sequen. Para aplicar o vinagre debemos de rocialo enriba das follas e tallos das herbas das que nos queiramos desfacer. Nuns días secarán. Porén, isto non fará que as plantas morran de raíz, polo que será preciso posteriormente arrincalas e extraer as raíces. Comelas Esta pode ser unha das maiores vitorias, desfacernos das herbas molestas que compiten contra os nosos cultivos aproveitándoas para as nosas comidas. Como vimos en leccións anteriores, hai infinidade de herbas, e mal chamadas “malas herbas”, que son comestíbeis e que proporcionan novos sabores e propiedades ás nosas ensaladas, sopas, infusións ou bebidas. Aprendendo a identificar algunhas delas poderemos aproveitarnos da súa presenza na horta e darlles unha nova utilidade. Acostumarnos a elas Se algo quedou claro ao longo de todas estas leccións nas que coñecemos as propiedades de moitas plantas e herbas silvestres é que a maioría de plantas teñen moitas utilidades e que non son un estorbo nas nosas hortas e xardíns, polo que tamén debemos aprender a convivir con elas e a rachar coas normas estéticas que pretenden obter xardíns perfectos e homoxéneos. As herbas forman parte da nosa flora, dos nosos campos e dos nosos terreos, e non pasa nada se medran en certos recunchos do noso xardín. Mais é certo que debemos controlalas nos bancais, testos e regos, xa que, do contrario, os cultivos veranse afectados por elas debido á competencia natural por nutrientes, humidade, espazo e osíxeno. Mais se algo nos queda claro é que non hai herba mala, que o mellor é coñecelas para poder beneficiarnos da súa presenza na casa e para saber utilizalas axeitadamente. Os 3 'R' na horta: Neutralización de obxectos cotiáns Non é raro atopar no fondo de andeis e caixóns cuncas, vasos, xerras e outros elementos de cociña que co paso do tempo foron deteriorándose e, aínda que ao mellor son funcionais, non os empregamos á hora de pór a mesa ao estaren algo escachados, vellos ou deteriorados. A gran maioría deles van servir como elementos decorativos e funcionais do horto ou para as plantas de interior. Á parte de ser uns testos perfectos para case calquera tipo de planta, como as aromáticas, flores ou pequenos cultivos, van dar un toque especial e diferente ao horto urbano ou ao recuncho que teñamos para plantar. Simplemente hai que deixar voar a imaxinación e tentar visualizar unha segunda vida para tantos e tantos elementos que temos almacenados pola casa sen ningún tipo de uso. Preparados naturais para a horta. Extracto fermentado de fieitas. As fieitas son unhas das plantas por excelencia do monte galego. Podemos atopalas en case calquera curruncho de bosque autóctono, e son unhas grandes aliadas na horta. Ademais de servir como acolchado tamén as poderemos utilizar para preparar un extracto fermentado que servirá como fertilizante e mesmo como insecticida. Que preciso? —1 kg de plantas sen raíz —Tesoiras ou coitelo —10 litros de auga —Un cubo con capacidade para 10 litros mín. —Un coador —Un pulverizador Receita —Recolle 1 kg de plantas, sen arrincar a raíz. Selecciona só as follas, xa que os talos son demasiado duros para fermentar axeitadamente. —Corta todas as plantas en anacos pequenos e ponas a macerar nun caldeiro cubertas con 10 litros de auga. Remexer ben para que se enchoupen. —Deixa o caldeiro uns 10 días nun lugar temperado (garaxe, corte...) —Debemos remexer esta mestura dúas veces ao día e ir controlando a fermentación. Evita que as fieitas se amazoquen moito. —No momento en que desaparezan as burbullas quere dicir que a fermentación rematou, polo que será o momento de pasar o líquido por un coador. —O líquido que precisemos meterémolo nun pulverizador e o sobrante gardarémolo nunha garrafa ou bidón. Como usalo? O extracto fermentado pode empregarse de abril a setembro. —Como fertilizante usarémolo para regar diluído a 10% cada 15 días. Usarémolo para regar aos pés dos cultivos de froito como pementos, tomates, cabaciñas etc. —Como insecticida e como repelente de insectos podemos usalo pulverizado as veces que se precise, a 5%. Serve para acabar con calquera tipo de pulgón. Eco-consello Os xeranios son unha das plantas máis típicas que decoran os nosos fogares, mais se os plantamos perto da nosa horta axudarán a repeler moitos tipos de insectos.