Curso de horta na casa: cultivos sinxelos para iniciarse

Como se amosou en leccións anteriores, cultivar un horto na casa é moito máis sinxelo do que de comezo se pode pensar. Ademais precísase moi pouca inversión de cartos e non fan falla espazos grandes para iniciarnos, podendo mesmo plantar no interior da casa ou do piso, en pequenos currunchos formados por macetas, hortos verticais, mesas de cultivo etc. Cada vez están máis de moda os hortos urbanos, hortos en terrazas e en definitiva o cultivo de verduras e hortalizas na casa. Isto supón unha gran fonte de alimentos saudábeis para moitas familias e un aforro na listaxe da compra. Ademais da satisfacción e a aprendizaxe continua de participar en todo o proceso desde a semente a ter o alimento no prato. Como en todos os eidos da vida, a horta require de práctica, coñecementos e experiencia que iremos collendo pouco a pouco. Pero dentro diso, hai algúns cultivos que son máis sinxelos que outros para comezar, e que poden a priori, dar menos problemas de pragas, espazo etc Cultivos sinxelos: —Tomates Os tomates son uns dos cultivos máis sinxelos para cultivar na casa. Ademais, precisan pouco espazo para medrar, polo que se poden plantar perfectamente nunha maceta, e unha única tomateira dará bastantes froitos. Así pois non fará falla ter moitas plantas para surtir unha familia enteira. O tomate da casa é un deses cultivos que se diferenza, dunha forma abismal, dos que adoita haber nos estantes do supermercado. O sabor e a textura dos caseiros non adoitar ter nin punto de comparación cos do supermercado, tendo os primeiros unha potencia de sabor moito maior e unha textura máis apetecíbel. É importante situar as tomateiras en lugares con abundante luz e regalas un par de veces por semana levemente. Non se deben encharcar as plantas nin mollar excesivamente as follas xa que son cultivos que tenden a padecer fungos. Débense plantar as tomateiras bastante profundas e ir podando algunhas ramas segundo van medrando. Desfacéndonos das follas máis baixas que tocan o chan e que poden contraer enfermidades facilmente. A medida que vaian medrando iremos colocando guías (cordeis ou paos) aos que ir suxeitando a planta para que poida medrar recta sen ser vencida polo peso das pólas e dos froitos. —Leitugas As leitugas son outros dos cultivos sinxelos que podemos comezar a plantar no horto. Debemos ter precaución cos insectos que poden acabar con elas e cos caracois ou lesmas, pero polo resto é un cultivo moi agradecido que precisa de poucos coidados. Pódense plantar tanto en interior como en exterior, mesmo en espazos reducidos como macetas, ou intercalándoas con outros cultivos. —Cenorias Outro cultivo sinxelo de cultivar e que non precisa moitos coidados é a cenoria. Plantaranse directamente a través de sementes no lugar definitivo onde queiramos telas (bancal, terreo, macetas...). Cómpre ter en conta que son cultivos de raíz polo que precisarán un recipiente o suficientemente fondo para que poidan medrar con liberdade. Cando comecen a medrar haberá que clarealas arrincando os exemplares que estean moi xuntos, posto que se non quedarán cenorias moi delgadiñas e longas por falta de espazo para medrar e anchear. Coas cenorias hai que ter a precaución de que non se vexan afectadas pola praga da mosca branca e, sobre todo, de que os ratos e toupas non se adianten e acaben con elas. Polo demais son cultivos moi sinxelos de coidar e plantar que poden sementarse en calquera época do ano. —Pementos Os pementos son outros dos cultivos sinxelos e agradecidos que non requiren de moito espazo, xa que un par de plantas van surtir duns cantos pementos sen ningún problema. A mellor data para plantalo é a primavera, na época en que comeza a ser máis estábel a temperatura, xa que é un cultivo que se ve amplamente afectado polas xeadas. É unha planta que require de sol para medrar e formar correctamente os seus froitos, polo que se optamos por tela en interior tentaremos outorgarlle unhas cantas horas de sol ao día. En canto ao terreo, non precisa de grande espazo para medrar, poderase plantar nun bancal, en regos ou en macetas. Ao igual que cos tomates, procurarase enterrar a planta bastante para que poida enraizar ben e tremar do peso que terá que aguantar unha vez que nazan os froitos. Iremos pouco a pouco pondo guías para facilitar que medre recta e que non sexa vencida polo peso das polas e dos pementos. —Acelgas As acelgas son outro dos cultivos agradecidos para ter en calquera horto. Son de rápido crecemento polo que as veremos medrar en pouco tempo e poderemos degustalas ao pouco tempo de plantalas. Son ben resistentes ás pragas e non adoitan verse afectadas por elas, excepto os caracois e lesmas, aos que lles teremos que controlar o acceso aos bancais e cultivos. Para plantar acelgas no exterior cómpre agardar a que rematen as xeadas. Porén, en interior pódense plantar xa desde ben cedo, en febreiro ou marzo. O único inconveniente é que precisan bastante espazo para medrar, polo que se recomenda deixar bastante espazo entre unhas e outras para que se poidan desenvolver con facilidade. A medida que vaian medrando as follas da acelga e vaian acadando un tamaño óptimo para o consumo iranse arrincando as follas grandes e deixando as pequenas, as cales nuns días estarán listas para consumir. É por tanto unha planta que vai dando progresivamente e da que nos beneficiamos durante varias semanas seguidas. —Allos e cebolas Os allos e as cebolas son cultivos moi recomendábeis para hortos en que haxa pouco espazo, xa que non precisan dunha gran separación entre eles. Pódense consumir tenros ou ben agardar a que estean completamente formados e secos para conservalos durante varios meses. Ademais son grandes aliados na horta, pois serven como insecticida natural. É moi recomendábel plantalos perto e incluso no medio doutros cultivos como leitugas, tomates, fresas e cenorias. Pola contra non é recomendábel plantalos entre eles, é dicir cebolas e allos xuntos, nin entre fabas, chícharos ou porros. Plantas aromáticas e flores Outros cultivos sinxelos de manter na horta, tanto no interior como no exterior, son as plantas aromáticas e as flores como por exemplo: menta, alfábega, perexil, ourego, capuchina, romeu, tomiño, caléndula.... Estas plantas precisan de moi poucos coidados e exixencias, alén de ter acceso frecuente a auga e ao sol e evitarlles o exceso de humidade se están no interior para protexelas de ataques de fungos. Estes son algúns dos cultivos máis doados para ter na horta exterior ou interior, pero hai moitos máis. O ideal é reflexionar sobre as preferencias de consumo de cada quen, e intentar adaptar o mellor posíbel os cultivos ao espazo de terra dispoñíbel. Ademais, cómpre sempre informarse con minuciosidade das características e exixencias de cada cultivo para poder solucionar todas as problemáticas que poidan ir xurdindo.