Curso de horta na casa: Técnicas para conservar alimentos

A continuación veremos como algúns deles son moi sinxelos de conservar e abonda con telos nas condicións óptimas de temperatura e humidade para que perduren moito tempo. Pola contra, outros produtos bótanse a perder en poucos días polo que deberemos consumilos rapidamente ou buscar o modo de conservalos para poder aproveitalos durante máis tempo. A continuación veremos diferentes métodos de conservado e cales son os máis axeitados para cada produto. Conservar ao aire Sen dúbida esta é a técnica máis sinxela e a que menos esforzo precisa, e servirá para conservar algúns produtos como patacas, allos ou cebolas. Estes non necesitan ningún tratamento especial para conservarse, só seren apañados no momento óptimo e asegurarnos de que estean completamente secos e sen humidade antes de almacenalos. Debemos gardalos nun lugar fresco, escuro e seco como caixas de cartón ou sacos, que permitan que estean illados e secos pero ao mesmo tempo que deixen pasar o ar. No caso das cebolas, poderemos elaborar un trenzado cos restos do tallo da planta e colgalas nunha especie de ramo. Conservaranse por máis tempo ocupando moi pouco espazo. Secar a sombra Algunhas plantas aromáticas como o perexil, alfábega, ourego, romeu, loureiro ou tomiño poderemos secalas como vimos en leccións anteriores coa técnica de colgalas en remo cara a abaixo nun lugar fresco e seco, coa técnica de secado en forno etc. Desta maneira, teremos as nosas plantas aromáticas ou medicinais dispoñíbeis en calquera época do ano. Conservar en tarros de cristal A conservación en tarros de cristal é bastante máis laboriosa que o resto de técnicas de conservado, pero é moi útil e servirá para gardar todo tipo de preparacións. Podemos conservar verduras e hortalizas guisadas, escaldadas, marmeladas, saltas de tomate, pisto, froitas en almibre... É moi sinxelo atopar publicacións e información en libros e páxinas web que ensinen a realizar diferentes tipos de conservas para gardar en tarros de cristal. Por norma xeral, hai que ter sempre moi presente certos aspectos como: —A importancia de seguir as receitas paso a paso para evitar que os produtos se boten a perder. —Manter unha hixiene e esterilización correcta dos botes e dos produtos para evitar que aparezan mofos. —Non reutilizar moitas veces os mesmos tarros para realizar conservas, xa que de usalos moito as roscas iranse gastando e chegará un momento en que non fechen hermeticamente e poidan botar a perder as conservas. —Antes de consumir unha conserva caseira debemos asegurarnos de que non existen malos cheiros ao abrir o bote, que non ten un aspecto raro e que non existen mofos na conserva ou na tapa. Xa que isto pode significar que non se fixo un correcto envasado ou esterilización e non sería apta para o consumo. Conservar en vinagre Esta técnica adoita utilizarse para conservar algúns produtos en concreto como ceboliñas, cogombros, alcaparras, chiles, pementos ou cenorias, xa que altera completamente o sabor do produto, polo que non é apto para todos os vexetais e vai depender moito dos gustos de cada persoa. Hai moitas receitas que explican, paso a paso, como aplicar esta técnica, que en termos xerais é bastante sinxela de realizar. Para conservar en vinagre pódense usar diferentes hortalizas como as citadas anteriormente, e tamén poderemos aromatizar con especias como cravos, grans de pementa ou grans de mostaza sen esquecer o sal e o azucre, que tamén serán indispensábeis no proceso. Desaconséllase o uso de herbas aromáticas que poidan desfacerse durante o proceso, como o ourego, perexil, tomiño etc. e que ademais poderían producir un sabor amargo nas conservas. Conservar en aceite de oliva A conservación en aceite é unha técnica moi eficaz e que mantén todas as propiedades dos produtos. O inconveniente está en que é un produto caro e en que precisaríamos unhas cantidades moi grandes para poder conservar unha cantidade de produtos suficiente para que merecese a pena o proceso. Deshidratar os produtos A deshidratación consiste en extraer completamente a auga dos nosos vexetais, hortalizas, froitas e incluso outros produtos como carnes ou pescados. No mercado existen na actualidade diversas máquinas deshidratadoras a prezos asequíbeis, pero ao igual que o conservado en aceite de oliva, vai axudar só a manter pequenas cantidades de alimentos, posto que, do contrario, converteríase nun proceso moi longo que non compensaría, xa que as deshidratadoras non teñen unha gran capacidade para acoller enormes cantidades de produtos, ademais de que estes deben de ir cortados en anacos pequenos e finos para facilitar o proceso. Tamén se pode realizar un proceso de deshidratación no forno ou incluso secando ao sol pero estas técnicas son máis complicadas para chegar a conseguir un resultado final óptimo. Conservado en frío Outra das técnicas para alongar a vida dos nosos cultivos é conservalos en frío. Para isto podemos facelo na neveira, onde conseguiremos alongar a vida unhas cantas semanas á maioría de produtos ralentizando o proceso de podredume, ou no conxelador. A técnica de conxelado pode aplicarse a case calquera cultivo, excepto a aqueles que teñan unha gran cantidade de auga xa que o seu sabor e textura se verían moi modificados e alterados. Pola contra, hai alimentos como os chícharos ou xudías que simplemente teríamos que introducir no conxelador sen ningún tipo de elaboración previa. Outros produtos como os grelos, repolos, acelgas, espinacas etc. é aconsellábel rescaldalos en auga fervendo antes de introducilos no conxelador. Grazas a este proceso podemos manter moitos alimentos durante varios meses dunha maneira económica e sinxela. Planificación Estas son algunhas das técnicas que podemos utilizar para conservar a nosa colleita durante máis tempo, pero non debemos esquecer a importancia de realizar unha boa planificación previa á hora de elaborar os sementeiros e de plantar para evitar que teñamos unha sobreprodución moi grande de produtos ao mesmo tempo, e intentar que sexa escalonada. Para isto debemos sementar gradualmente produtos como os repolos, leitugas etc., que teñen unha capacidade de conservación moi limitada e que pronto comezan a murcharse e podrecer, para non xuntarnos cunha cantidade grande de vexetais que non sexamos quen de xestionar. Os 3 'R' na horta: Reutilizando tarros Os tarros de conservas adoitan ser elementos moi útiles tanto na horta como no fogar. Na lección anterior falabamos da importancia de conservar as sementes dos nosos cultivos despois da colleita, e os tarros de vidro son unha das mellores opcións para ambos os casos. No que respecta ás sementes, utilizaremos os tarros para gardalas hermeticamente e que non collan humidade. E no caso dos cultivos, poderemos reutilizar os tarros de cristal para gardar conservas en aceite, en vinagre, marmeladas etc. A continuación veremos como preparar algúns destes produtos e o mellor modo de conservalos para evitar que se boten a perder. Para ambos os dous casos, tanto no das sementes como no das conservas, debemos asegurarnos moi ben de que os tarros estean perfectamente limpos e desinfectados. Preparados naturais para a horta. Decocción de fieita como repelente de caracois. As fieitas son plantas moi sinxelas de atopar nos nosos bosques, camiños e montes, e teñen unha serie de propiedades que podemos aproveitar para diferentes usos. Hoxe aprenderemos a realizar unha decocción con esta planta que nos servirá para repeler caracois e lesmas dos nosos cultivos. Que preciso? —100 gramos de fieitas frescas ou 20 gramos de planta seca —Tesoiras ou coitelo —1 litro de auga —Unha pota ou cazo —Un coador —Un pulverizador Receita —Apaña 100 g. de planta fresca ou colle 20 g. de planta seca que teñas recollida. —Métea nun recipiente e déixaa a remollo toda a noite para facilitar a extracción dos principios activos. —Ao día seguinte corta todas as plantas en anacos pequenos e ponas nun recipiente de aceiro inoxidábel cubertas cun litro de auga. —Cubre cunha tapa ou unha gasa e deixa macerar até o próximo día. —Ao día seguinte pon o recipiente a lume baixo e deixa ferver durante 20 minutos. É importante realizar a cocción coa tapa posta para non perder os aceites volátiles. —Apaga o lume. Que arrefríe completamente. —Unha vez fría, filtra e incorpora o líquido a un pulverizador. Como usalo? A decocción pode usarse durante todo o ano como repelente de caracois e lesmas. Aplicarase preferibelmente pola mañá antes de que quente o sol. Pulverizada pura, dun modo periódico, nos cultivos que adoitan sufrir ataques de lesmas e caracois, ou ao seu redor. Eco-consello Os lucecús axudarán a manter á raia os caracois, lesmas e vermes da horta, pois non convén espantalas e si atraelas!