Curso de horta na casa: o regado

Non podemos estabelecer unha pauta fixa para o regado da nosa horta ou plantas xa que, dependendo da especie, do estado da planta, do desenvolvida que estea e da situación climática, da temperatura ou do tipo de substrato, precisará máis ou menos cantidade de auga e con maior ou menor frecuencia. Non é o mesmo a auga que pode precisar un cultivo que está comezando a desenvolverse que un cultivo ou planta adulta. O primeiro requirirá de moita menos auga que o segundo. De todos formas, os sementeiros, por exemplo, precisan dun goteo continuo de auga que os manteña húmidos todo o día. Non se trata de crear unha lameira e de encharcalos, mais si precisan estar húmidos continuamente para poderen xerminar e enraizar. Por tanto, non necesitan moita cantidade de auga, pero si demandan humidade constante. Tamén dependerá de onde estea situada a planta ou cultivo. Por exemplo, unha planta que se atope no interior dun invernadoiro en verán precisará unha achega de auga maior que unha planta que estea no exterior podendo beneficiarse de choiva ou auga de modo natural. Como normas xerais podemos estabelecer que: —As plantas precisan maior cantidade de auga a medida que se van desenvolvendo, por tanto ao inicio do crecemento, aínda que necesitan auga e humidade, non será indispensábel un regado tan abundante como cando o cultivo é “adulto” e está desenvolvendo as flores e os froitos. —Dependendo da climatoloxía e das horas de sol e calor que reciban os cultivos haberá que aumentar ou diminuír a frecuencia e cantidade de regado, evitando así que poida verse afectada a saúde dos cultivos. Canta máis calor e máis horas de sol, máis auga teremos que achegar. Pola contra, canta menos calor faga ou se os cultivos están obtendo auga a través da choiva, debemos diminuír a frecuencia de regado. Se nos pasamos coa cantidade de auga veremos como comezan a proliferar fungos e mofos na terra onde está plantado o cultivo, unha alerta de que estamos achegando demasiada auga Que pistas dá o terreo? Unha vez que vaiamos coñecendo as necesidades máis específicas de cada cultivo (que cantidade de auga e frecuencia de regado precisa cada un, por exemplo), iremos estabelecendo unhas pautas de regado para seguir día a día e semana a semana. Non obstante, o terreo e os propios cultivos irán dando información de forma continua, o que nos facilitará estabelecer as pautas de regado: —Observando ou palpando o terreo podemos saber o nivel de humidade que ten. Canto máis escuro estea, máis cantidade de auga terá. O ideal (excepto nalgúns casos de plantas que precisan moi pouco rego) é que o terreo estea sempre húmido, mais non encharcado. Por iso débese ofrecer un modo de drenar o sobrante. No caso de plantar en testos debemos sempre deixar buracos que faciliten a expulsión do sobrante. —Se nos excedemos coa cantidade de auga veremos como comezan a proliferar fungos e mofos na propia terra onde está plantado o cultivo. Esta situación servirá como alerta de que estamos introducido demasiada auga e deberemos espazar o regado ou a cantidade de auga ofrecida. Tipos de rego Temos varias formas de achegar auga ás plantas e cultivos. O máis sinxelo, se estamos no interior dunha casa, é empregar un pulverizador ou unha regadeira, aínda que tamén existen no mercado unha especie de regadores por goteo que manteñen unha humidade constante nos testos para despreocuparnos no día a día. Se plantamos no exterior ou en invernadoiro temos varias alternativas de regado. Podemos regar a través de mangueira ou á man. Isto está ben se temos unha superficie pequena, mais no caso de dispor dunha superficie moi extensa o labor de regado, sobre todo nos meses de maior calor, pode levar moito tempo para poder asegurarnos de que as plantas e cultivos reciben a cantidade óptima de auga. Un dos métodos de regado máis eficaces é o rego por goteo, que se programará a través dun mecanismo automático no que se estabelecen as horas de regado e os minutos que queremos que regue. Deste modo, evitarase ter que estar no horto cando haxa que regar e tamén poderemos espazar regados curtos varias veces ao día. Este método beneficiará moito os cultivos e é un sistema que optimiza o consumo de auga, facendo que as plantas teñan durante todo o día a auga necesaria gastando os menos recursos posíbeis. Segundo vaian cambiando as condicións térmicas ou climáticas debemos ir adaptando a frecuencia e cantidade de rego para non excedernos nin quedarnos curtos. Canta auga precisan os cultivos? Como falamos xa en leccións anteriores, a planificación na horta é moi importante. É por iso que debemos ter en conta que hai especies que precisan unha maior cantidade e frecuencia de regado que outras, polo que é moi importante que teñamos en conta, á hora de distribuír os cultivos, as necesidades específicas de cada un, evitando así pór no mesmo bancal ou testo -ou nun espazo moi próximo- cultivos que precisen moi pouca auga con outros que necesiten moita, xa que isto dificultaría a tarefa de regado e faría que uns cultivos se visen afectados polo exceso ou carencia de auga. —Plantas que precisan moito rego: cabaciñas, porros, apio, alcachofas, cabazas... —Plantas que precisan rego moderado: tomates, chícharos, cogombros, leitugas... —Plantas que precisan pouco rego: allos, cebolas, lentellas, aromática como o romeu, tomiño, ourego, lavanda... Un dos métodos máis eficaces para axudar as plantas e cultivos a manterse sans e refrixerados é o 'mulching', técnica que consiste en colocar capas vexetais sobre a terra que proporcionan un acolchamento aos cultivos Algúns trucos —Se finalmente decidimos realizar o regado á man, é dicir, con regadeira ou mangueira, debemos ter en conta non mollar moito as partes aéreas das plantas, xa que un exceso de humidade nas follas, tallo e flores das plantas ou cultivos poden facer que proliferen con facilidade pragas e fungos que poden rematar coa saúde da nosa planta. —Acolchar a terra: Un dos métodos máis eficaces para axudar as plantas e cultivos a manterse sans e refrixerados é o mulching, técnica consistente en colocar capas vexetais sobre a terra que proporcionan un acolchamento aos cultivos, facendo que a terra non sufra cambios tan bruscos de temperatura e reteña mellor a humidade. Ademais, serve de fertilizante e como achega de materia orgánica para os propios cultivos. O acolchamento pode facerse con restos vexetais como herba seca, restos de poda de sebes, palla, follas secas etc., que simplemente teremos que colocar ao redor dos cultivos, xusto enriba da terra, cubrindo completamente toda a zona en que se atope a planta. Os 3 'R' na horta: Reciclando recipientes para sementeiros Nas leccións anteriores descubrimos que elementos cotiáns que temos no fogar poden servir como recipientes para elaborar sementeiros ou plantar cultivos de pequeno tamaño como aromáticas, plantas de interior. Outros dos obxectos que se pode reciclar son os recipientes onde adoitan vir os ovos, vasos de plástico, vasos de iogures... O ideal é tentar consumir menos envases e esforzarse en buscar alternativas máis ecolóxicas e duradeiras que poidan ter unha vida útil máis longa. Mais sempre que empreguemos envases de “usar e tirar” podemos buscarlles unha segunda vida, xa que o planeta e a nosa economía veranse melloradas grazas a pequenos xestos deste tipo. Cómpre non esquecer realizar uns pequenos orificios de saída na base dos envases que utilicemos como testo ou sementeiro, xa que serán necesarios para que a planta e o substrato vaian regulando a cantidade de auga que precisen. Infusión de allo para combater o pulgón O pulgón é unha das pragas máis comúns que poden afectar ás plantas e cultivos, tanto no interior como no exterior. Entre as causas que provocan a aparición destes pequenos insectos están a as temperaturas altas, o exceso de rego e a falta de nutrientes. Se as plantas e cultivos se ven afectados por estes insectos a súa saúde pode minguar e mesmo correr perigo a supervivencia da planta, xa que os pulgóns se alimentan da súa savia, o que fai que diminúa o crecemento e a floración. É moi sinxelo detectar o pulgón, xa que adoita estar situado na parte posterior das follas e nas xemas tenras da planta. Son insectos de tons escuros que acostuman aparecer en grandes grupos. A continuación aprenderemos a preparar unha infusión que servirá para combater esta e outras pragas, e que podemos elaborar de forma sinxela e económica na casa. Que preciso? —7 dentes de allo —Media cebola —Un chorro de vinagre —1 litro de auga —Unha pota —Un pulverizador —Un coador Receita —Mestura todos os ingredientes nunha pota xunto con 1 litro de auga e deixa macerar durante 24 horas. —Pasadas as 24 horas, ferve a auga durante 12 minutos a lume baixo. —Retira do lume e deixa arrefriar. —Cando a mestura estea fría haina que coar. Os restos sobrantes engadiranse á compostadora para aproveitalos. —Introduce o líquido nun pulverizador. Como usalo? —Este preparado hai que aplicalo ao amencer, antes de que o sol colla forza e suba a temperatura, xa que entón deixa de ser efectivo ao vérense degradadas as súas propiedades. Pulverizaremos coa mestura pura sen rebaixar as zonas dos cultivos afectadas por pulgón durante aproximadamente uns cinco días até que vaia desaparecendo a praga. Eco-consello Plantar romeu perto de cultivos como repolos, coliflores, brócolis, coles... fará que estes teñan menos posibilidades de sufrir ataques de pragas.