O Servizo Galego de Saúde (Sergas) comunicou esta sexta feira un cambio nas restricións derivadas do coronavirus nas cidades de Vigo e A Coruña. Após detectar unha evolución favorábel, ambas urbes foron baixadas ao nivel medio de limitacións a través dun anuncio no Diario Oficial da Galiza (DOG).
Na versión “BIS” deste documento oficial, explícase que no momento no que decorreu a reunión do Comité Clínico “a súa situación era propia do nivel alto, ben que xa se advertía que a súa evolución era favorábel e que era posíbel que puidesen descender de nivel nos seguintes días”.
O Informe da Dirección Xeral de Saúde Pública datado a 20 de agosto revela esa melloría da afección da Covid-19, polo que as prohibicións serán menores nos dous municipios -que estaban no chanzo alto- a partir deste fin de semana.
“Concretamente, no caso de Vigo, saliéntase que a súa taxa de incidencia axustada a 7 días é propia do nivel medio de restricións; ademais, neste concello a razón de taxas a 7 días está por debaixo do 1 (concretamente é de 0,68), o que confirma a boa evolución da situación”, indica a Consellaría de Sanidade a través do escrito.
Alías, “o concello da Coruña tamén amosa unha mellora importante da súa situación epidemiolóxica, cunha evolución moi favorable que se reflicte nunha razón de taxas a 7 días por debaixo do 1 (concretamente, 0,60), o que significa que a incidencia a 7 días está a descender, cunha redución do 40 % con respecto á semana anterior”.
Medidas a cumprir
A baixada das dúas cidades máis grandes do país implica que alí a máscara será obrigatoria en todo momento para os maiores de seis anos en espazos fechados de uso público aínda que se poida garantir a distancia de seguridade de 1,5 metros. O mesmo sucederá nos lugares ao aire libre.
Os lugares de culto ficarán ao 75% da súa capacidade, mentres que tanto piscinas como parques acuáticos poderán aceptar a entrada do 50% das persoas que poderían ser atendidas en condicións normais, entre outras cuestións.
No que se refire á hostalaría, tamén haberá un 50% de limitación cun máximo de seis persoas por mesa en interiores e de dez nas terrazas. Non haberá servizo de barra. No lecer nocturno, as medidas serán moi similares.
Os municipios, por chanzos de prohibicións
Así ficarán con restricións altas Arbo, Ares, Arteixo, O Barco, Betanzos, Bueu, Cabana de Bergantiños, Cabanas, Camariñas, A Cañiza, Cee, Fisterra, O Grove, Laxe, Malpica, Meis, Miño, Muxía, As Neves, Nigrán, Ponteareas, Ponte Caldelas, Pontedeume, Rábade, Redondela, A Rúa, O Rosal, Sada, Tomiño, Tui e Vimianzo.
Na mesma situación que A Coruña e Vigo estarán os seguintes municipios: Abegondo, Allariz, Ames, Avión, Baiona, Barreiros, Boiro, Caldas, Cambre, Cangas, Cambados, O Carballiño, Carballo, Cariño, Carral, Catoira, Cerceda, Chantada, Coirós, Coles, Corcubión, Coristanco, Culleredo, Curtis, Fene, Ferrol, Gondomar, A Guarda, A Illa, A Lama, A Laracha, Lugo, Marín e Moaña.
Igualmente comparten nivel Mondariz, Mondoñedo, Monforte, Monterroso, Mos, Narón, Neda, Oleiros, Ourense, Outeiro de Rei, Oza-Cesuras, Padrón, Pazos de Borbén, Poio, Ponteceso, Pontevedra, O Porriño, Portas, Rianxo, Ribadeo, Ribeira, Salceda de Caselas, Salvaterra de Miño, Santa Comba, Santiago de Compostela, Sanxenxo, Sarria, Silleda, Soutomaior, Touro, Trazo, A Veiga, Verín, Vilagarcía, Viveiro, Xinzo de Limia e Zas.
