A Covid dá tregua, mais é "insuficiente" para a desescalada

Galiza manterá o nivel máximo de restricións, como mínimo, até a vindeira segunda feira, cando se volverá reunir o Comité Clínico para avaliar a situación pandémica. Porén, após o encontro desta segunda feira, o presidente da Xunta, Alberto Núñez Feixoo, anunciou a "apertura gradual" en seis eidos: educación, comercio, deporte, transporte, cultura e residencias. As novas medidas serán publicadas no Diario Oficial da Galiza (DOG) e entrarán en vigor na madrugada da terza á cuarta feira. "As limitacións que aprobamos o pasado 27 de xaneiro están a ser útiles, porque os datos confirman de forma notábel a tendencia á baixa, mais a melloría é aínda insuficiente", expuxo o mandatario galego, que fixo alusión ao descenso da incidencia acumulada a 14 días, cuxo valor hai dúas semanas era de 779 casos por cada 100.000 habitantes e agora se sitúa en 400, o que supón 48,6% menos. "Seguimos en risco extremo, por riba de 250, e a presión hospitalaria segue a ser moi elevada, polo que é preciso que manteñamos o nivel de restricións actual", dixo, e desbotou de novo o confinamento. "Prudencia" para unha desescalada "gradual" En consecuencia, todos os concellos do país seguirán fechados individualmente, desbotándose a idea de volver aos fechamentos "por améndoas". Tampouco se permitirá, polo de agora, a interacción social entre persoas non conviventes, xa que, aseverou, a súa prohibición foi "chave" para deter a progresión da Covid. A cepa británica é xa "predominante" na Galiza Núñez Feixoo pediu un novo esforzo á cidadanía a pesar do "cansazo e a incerteza" froito da "fatiga pandémica". Deste modo, o presidente apelou á "prudencia" para levar a cabo unha desescalada "medida e gradual" por catro motivos: as experiencias pasadas, que evidencian que a incidencia sobe "máis rápido do que baixa"; por "xustiza", de cara ao persoal sanitario que leva "case un ano combatendo a pandemia en primeira liña" e ás persoas afectadas polas "consecuencias económicas" das restricións; para non "frustrar as expectativas abertas coa vacinación", e, fundamentalmente, pola incidencia das novas variantes do virus, que poderían agravar a crise sanitaria no país. "A cepa británica xa é predominante na Galiza, e aínda nos quedan a surafricana e a brasileira. É moi importante consolidarmos esta melloría para afrontar en boas condicións estas variantes que supón un ritmo explosivo de contaxios", salientou. Horario ampliado no comercio "non esencial" Os estabelecementos considerados "non esenciais", que desde o 27 de xaneiro tiñan que baixar a persiana ás 18 horas, a partir desta cuarta feira poderán facelo ás 21.30 horas, mantendo a capacidade máxima en 50%. Os centros comerciais, con todo, ficarán fechados as fins de semana, e nos días lectivos seguirán abrindo no mesmo horario que o resto da actividade comercial. Apertura das instalacións culturais e deportivas O sector cultural será un dos grandes beneficiados deste lixeiro "alivio" das restricións. Así, poderán abrir de novo as súas portas as bibliotecas, arquivos, museos, salas de exposicións, cinemas e auditorios, cunha capacidade máxima de 30% e respectando o toque de recoller, que fica nas 22 horas. No tocante á actividade deportiva, retomarase a competición federada a nivel da Galiza e permitirase empregar as instalacións ao aire libre para a práctica individual. Os ximnasios seguirán fechados, mais o Comité estudará a súa situación a vindeira segunda feira. Volta ás aulas presenciais Nos centros de ensinanza especial, os conservatorios de música (agás para instrumentos de vento e actividades de canto) e as escolas de idiomas volverán impartir aulas presenciais na segunda feira día 22 de febreiro. As e os estudantes das universidades galegas, pola contra, deberán agardar ao primeiro de marzo para abandonar a docencia telemática. A vindeira semana, segundo informou Núñez Feixoo, realizarase un cribado masivo no que se convidará a participar a toda a comunidade universitaria. Visitas ás residencias Por outra banda, esta cuarta feira comezará o proceso de "desescalada" nas residencias. Así, aqueles centros nos que se completase o ciclo de vacinación hai dez ou máis días ampliarán as visitas ás e os residentes a tres por semana, con dous familiares de referencia. Nos centros de atención á discapacidade retomaranse as saídas de fin de semana coas familias, coa mesma condición de teren recibido as persoas usuarias as dúas doses da vacina con dez días de antelación. "Seguridade" na hostalaría Após as múltiples denuncias do sector do transporte, finalmente Sanidade optou por permitir a apertura da restauración nas áreas de servizo, a fin de que as e os transportistas "debidamente acreditados" poidan comer de forma individual nas mesas dos recintos. A restauración poderá abrir nas áreas de servizo para as e os transportistas Por outra banda, o presidente abriu a porta ao inicio da "desescalada" no conxunto do sector hostaleiro a partir da vindeira semana, "se a tendencia segue á baixa". Para iso, a Xunta traballa desde a tarde desta segunda feira nun "plan de hostalaría segura" sostido sobre tres piares: o control da capacidade máxima, garantindo que se respecte a distancia de 1,5 metros entre mesas; un rexistro de entrada de todas as persoas consumidoras, a fin de localizar os contactos dun hipotético positivo pola Covid, e unha intensificación das inspeccións policiais nos estabelecementos. Campaña de vacinación Así e todo, Núñez Feixoo anunciou que a vindeira segunda feira comezará a vacinación das persoas maiores de 80 anos, iniciándose cos apelidos da letra "H". A inoculación dos viais realizarase nos diferentes centros de saúde da xeografía galega, e, no caso de que o desprazamento non for posíbel por problemas de mobilidade, as e os sanitarios acudirán aos domicilios das persoas afectadas. A vacinación das persoas maiores de 80 anos rematará entre finais de abril e comezos de maio Entre finais de abril e principios de maio, dixo, rematará esta quenda de vacinación, que se realiza en paralelo á do persoal do Servizo de Axuda no Fogar (SAF) e dos sanitarios restantes. A respecto do ritmo de vacinación, o mandatario volveu insistir en que Galiza ten capacidade para administrar "100.000 doses ao día", e instou o Goberno estatal a enviar a Galiza "8,2%" dos 20 millóns de vacinas de Janssen que poderían chegar en marzo, correspondentes á relación de persoas maiores de 80 en comparación cos demais territorios do Estado.