Coronavirus Galiza: os casos activos soben a 75.961 mentres os ingresos en UCI fican estábeis

Segundo os datos actualizados na mañá desta cuarta feira pola Consellaría de Sanidade, con rexistros até as 18 horas da terza, aumentan a 55 as persoas ingresadas en UCI pola Covid-19 na Galiza (+2) e a 553 as hospitalizadas noutras unidades (+4), mentres 75.353 pacientes están en seguimento no seu domicilio.

Por áreas sanitarias, a presión hospitalaria alíviase en tres: Ourense-Verín-O Barco, Lugo-A Mariña-Monforte e Compostela-O Barbanza, ao tempo que aumenta nas outras catro: Vigo, A Coruña-Cee, Ferrol e Pontevedra-O Salnés.

Así, na de Ourense seguen sete pacientes en UCI e descenden a 77 os ingresados noutras unidades (-7); en Lugo, descenden a cinco o críticos (-1) e a 49 os hospitalizados noutras unidades (-4). Na área de Compostela, malia aumentaren a oito os pacientes Covid en UCI (+2), descenden a 83 os ingresados noutras unidades (-3). Polo seu lado, na área da Coruña soben a 14 os críticos (+1) e a 136 os ingresados noutras unidades (+4); mentres que na de Vigo seguen 10 en UCI e soben a 100 os doutras unidades (+8).

E as áreas de Ferrol e Pontevedra seguen sen cambios en UCI, con catro e sete hospitalizados respectivamente, mentres que aumentan a 34 (+5) e 74 (+1) os ingresados noutras unidades.

Case 76.000 casos activos

Os casos activos seguen en aumento no conxunto da Galiza e alcanzan os 75.961, que implican 2.273 máis que a xornada anterior, ao haber máis contaxios (6.619) que altas (4.344), ao que se engaden dous falecementos. Con respecto a hai unha semana, a cifra é algo inferior, xa que o mércores 12 de xaneiro había 76.276 infeccións.

Por áreas sanitarias, os casos activos aumentan nas sete, coa de Vigo á cabeza (+859), seguida da da Coruña (+458), Compostela (+342), Pontevedra (+341), Lugo (+188), Ourense (+51) e Ferrol (+34). Por tanto, con máis casos activos fica a área sanitaria de Vigo, con 20.348; seguida da da Coruña, con 15.388; Compostela, con 11.365; Pontevedra, con 8.908; Ourense, con 8.229; Lugo, con 7.745; e á cola segue a de Ferrol, con 3.978.

Segundo os últimos datos actualizados polo Ministerio de Sanidade este 18 de xaneiro, a incidencia acumulada a 14 días descende lixeiramente no país a 3.426 casos por cada 100.000 habitantes, fronte aos 3.307 de media no conxunto do Estado, que tamén mingua.

Repuntan os novos contaxios

No que respecta a os novos contaxios de Covid-19, após un par de xornadas en descenso repuntaron a 6.619, após comezar esta semana con 4.916. Con todo, mantense por baixo dos 8.343 detectados hai unha semana, o mércores 12 de xaneiro. Deste modo, a Galiza suma desde o inicio desta pandemia 351.857 contaxiados por coronavirus, dos que 81.547 corresponden á área de Vigo; 74.393, á da Coruña; 53.089, á de Compostela; 43.664, á de Ourense; 41.828, á de Pontevedra; 36.397, á de Lugo; e 20.939, á de Ferrol.

No conxunto da Galiza nas últimas 24 horas efectuáronse 6.752 PCR (2.530 máis que a xornada anterior), que eleva a 3.479.139 as realizadas desde o inicio da pandemia; e 9.832 test de antíxenos (uns 1.390 máis), que suman 1.315.203. Entre os dous constitúen 16.584, o que supón unhas 3.900 probas máis feitas que o día pasado.

En canto á taxa de positividade en PCR, aumenta lixeiramente a 18,7%, e segue por riba do limiar do 5% que fixa a Organización Mundial da Saúde (OMS) para dar por controlada a pandemia.

Persoas falecidas e curadas

Pola súa banda, as persoas falecidas diagnosticadas coa Covid-19 desde o inicio desta pandemia en toda a Galiza ascenden a 2.858, ao notificar Sanidade esta terza feira dúas novas vítimas. En concreto, estes dous falecementos tiveron lugar na segunda feira, e ambos os dous presentaban patoloxías previas.Eran un home de 55 anos de idade ingresado no Complexo Hospitalario Universitario de Ourense e outro de 85, no Complexo Hospitalario Universitario de Vigo.

Mentres, 273.086 persoas diagnosticadas de coronavirus curáronse no país desde o comezo desta crise sanitaria, que representan 4.344 máis que as rexistradas até o día anterior.