A obrigatoriedade de presentar o Certificado Covid para acceder á hostalaría e o toque de recoller estabelecido pola Xunta para reducir o risco de contaxios do coronavirus durante o nadal volven estar en tela de xuízo. Malia que o Tribunal Superior de Xustiza da Galiza (TSXG) foi dando o seu visto e prace ás diferentes medidas para loitar contra a sexta onda, ambas normas veñen de ser recorridas.
En consecuencia, a Xustiza galega terá que referendar a súa opinión positiva sobre a necesidade de contar co pasaporte Covid nos locais -agora en todos, mais até hai unhas semanas só a partir das 21 horas.
Tamén deberá volver opinar sobre o estabelecemento dun toque de recoller de 3 a 6 da madrugada até o 18 de xaneiro, ou retirar o seu apoio a estas limitacións fronte á pandemia.
O TSXG alegara que era o máis adecuado ao prevalecer a seguridade por enriba dos dereitos persoais
No seu momento alegou que era o máis adecuado porque prevalecía a seguridade sanitaria por enriba dos dereitos persoais e que estas cuestións tampouco afectaban tanto a estes últimos. Porén, Vox vén de tramitar un recurso contencioso-administrativo contra a orde da Consellaría de Sanidade do pasado 29 de decembro.
Aliás, a formación exixe que se suspendar cautelarmente outras medidas como o certificado de vacinación para aceder aos negocios de lecer nocturno e aos hospitais, entre outros espazos.