Pili Estévez fai parte da Plataforma galega en defensa do dereito ao aborto. Do seo deste espazo de traballo colectivo xurdiu a convocatoria dunha manifestación unitaria o vindeiro 8 de marzo. Desde a "diversidade" do feminismo galego lanzan un chamamento a se mobilizar no Día Internacional das Mulleres polos dereitos de todas e contra o "retroceso" que en materia de igualdade están a supor as políticas da dereita.
Baixo o lema 'Feminismo para avanzar, xuntas nunha mesma loita' a manifestación partirá da estación de comboios de Compostela o domingo ás 12.00 horas.
Como xorde a convocatoria dunha mobilización unitaria?
O 8 de marzo é unha data de axenda que abrangue todo o feminismo. O pasado ano fora convocada a manifestación desde a Plataforma galega en defensa do dereito ao aborto mais este ano entendiamos que a convocatoria debía partir do conxunto do feminismo galego na súa diversidade, de todas as organizacións e colectivos. De aí que sexa un chamado amplo e unitario. Coidamos interesante confluír.
A manifestación, convocada baixo o lema "Feminismo para avanzar", partirá da estación de comboios de Compostela o domingo ás 12 horas
Nos últimos anos a loita en defensa dos dereitos sexuais e reprodutivos, nomeadamente o dereito ao aborto, centrou as reivindicacións. Desta volta, volve ser un 8 de marzo transversal?
Desde o momento no que é unha convocatoria unitaria trascende a unha soa loita. Todas as organizacións e mesmo a propia plataforma coincidimos en denunciar os retrocesos sociais que se están a producir froito das políticas do Partido Popular. No plano social, económico ou laboral. Neste senso, o lema é o máis expresivo posíbel [Feminismo para avanzar, xuntas nunha mesma loita].
"Se quedamos na casa, se non alzamos a nosa voz, esmagarán os nosos dereitos"
Existe unha variábel de xénero nas consecuencias da crise?
Por suposto. A situación das mulleres, por exemplo, no mundo laboral así o evidencia. Atínxenos unha maior taxa de desemprego e precariedade. Aliás, padecemos a volta ao rol asignado de coidadoras téndomos que asumir o traballo da casa, non remunerado, co que se está a suplir o desmantelamento dos servizos sociais e das axudas.
Para alguén que nunca participara nunha mobilización o 8 de marzo, que razóns lle darías para acudir?
Esta é unha loita importante, como tantas outras. Se quedamos na casa, se non alzamos a nosa voz, esmagarán os nosos dereitos. E vímolo, por exemplo, coa retirada do anteproxecto de lei de reforma do aborto. Se non fose pola presión social e o custe electoral que esta cuestión lles estaba a carrexar non o terían retirado. Os dereitos non se agasallan, conquístanse. É por iso importante loitar.
Fe de grallas. Este artigo foi editado por volta das 12.20h para mudar o que, por erro, se atribuíu como lema da manifestación e que, en realidade, se corresponde co título do manifesto de convocatoria, 'Resistimos e loitamos'. A lexenda correcta é 'Feminismo para avanzar, xuntas nunha mesma loita'.