Dado que as pescudas da Garda Civil sobre o asasinato de Beatriz Rodríguez Mariño e de Sergio Rodríguez Fernández se centran no ex compañeiro da muller, o movemento feminista galego convocou para esta segunda feira concentracións en distintos puntos do país en repulsa contra o crime machista.
De se confirmar o feminicidio de Arbo, trataríase do segundo na Galiza, segundo cifras oficiais, no que vai de ano após o asasinato de Isabel Fuentes o 8 de maio no Hospital de Ourense (CHUOU).
As convocantes salientan que seguirán na rúa “mentres se manteñan as estruturas e os valores patriarcais que perpetúan e consolidan na sociedade esta violencia sexista, este feminicidio, estas agresións e asasinatos de mulleres”. Advirten de que “ningunha agresión ficará sen resposta”.
O movemento feminista fai un chamamento a toda a sociedade galega a participar nas concentracións de repulsa que terán lugar mañá ás 20h nos seguintes lugares:
Compostela: Porta do Camiño
A Coruña: Obelisco
Ferrol: Praza do Concello
Ourense: Subdelegación do Goberno
Vigo: No Marco