![Barco ro-ro 'Prometheus Leader', atracado en Vigo e en corentena, tras confirmarse 6 positivos de Covid-19, tres coa variante india do virus [Imaxe: Europa Press].](/asset/thumbnail,1280,720,center,center/media/nosdiario/images/2021/05/01/2021050116271219807.jpg)
Sanidade confirmou este sábado que tres das cinco mostras de Covid-19, pertencentes a tripulantes do buque Prometheus Leader, que permanece en corentena no porto de Vigo, correspóndense coa denominada variante india do virus.
Segundo informou o Servizo Galego de Saúde (Sergas), o Servizo de Microbioloxía do Hospital Álvaro Cunqueiro detectou a presenza da variante india en tres das cinco mostras analizadas de tripulantes contaxiados.
Trátase da variante B1.617, subvariante 2, que, segundo Sanidade, "é sensíbel á vacina". "Por tanto, neste momento, este gromo está localizado e controlado", sinalaron as mesmas fontes.
O barco Prometheus Leader, con bandeira de Singapur, permanece atracado no peirao de transatlánticos do Porto de Vigo desde principios de semana, despois de que desen positivo por Covid-19 seis dos seus 22 tripulantes.
O Sergas decidiu realizar a secuenciación xenómica de mostras de cinco dos afectados, polo seu perfil clínico e por ser persoas procedentes de India. Agora os estudos desvelaron que tres casos correspóndense coa variante india.
Do total de tripulantes infectados hai dous que tiveron que ser hospitalizados, e que permanecen "estábeis" en planta do Hospithal Vithas de Vigo. O resto de contaxiados presentan síntomas leves ou son asintomáticos.
