Colectivos como Foro Galego da Inmigración, SOS Racismo, Resistencia en Terra Allea, Raias Travesseiras, Asociación Fuco Buxán e ODS-Coia están detrás da campaña 'Normalizar dereitos'.
Esta iniciativa leva varias semanas tentando sensibilizar e denunciar a situación que padecen persoas migradas, refuxiadas e racializadas para dar a coñecer algunhas da vulneracións de dereitos que se están a producir no contexto galego e español.
Na tarde de hoxe, a iniciativa convocou na praza compostelá do Toural unha concentración en contra do racismo, o colonialismo e as políticas migratorias e de fronteiras.
Neste encontro quixeron denunciar tamén o "abandono institucional cara ás persoas que sosteñen servizos esenciais", como a recollida de froita ou os coidados, que nesta situación de crise sanitaria quedaron sen ningún tipo de apoio ou prestación.
A campaña alerta ademais da "normalización dos discursos de odio" que se está a producir nos últimos tempos.
Igualmente aludiron ás consencuencias que ten a presenza da extrema dereita nas institucións, nos espazos mediáticos e nas rúas.