Decenas de persoas de diversos colectivos sociais e feministas concentráronse no exterior da Sala Capitol, en Santiago de Compostela, polo concerto que o cantante misóxino Kaidy Cain vai dar na cidade nesta quinta feira.
Desde as 20 horas, e ante un amplo despregamento policial, as persoas concentradas reuníronse para protestar pola presenza do artista, coñecido polas súas letras machistas e vexatorias coa muller, en Santiago.
O cantante, que xa tivo que cancelar un concerto na cidade en 2016 grazas á presión de varios colectivos feministas, foi acusado hai unhas semanas por varias mulleres de drogalas e abusar sexualmente delas.
Durante a concentración, puidéronse escoitar proclamas como "A Policía Española, incubre violadores" e "A xente que entra, acolle violadores".
"Repulsa" institucional
Na cuarta feira, a concellaría de Políticas de Igualdade de Santiago de Compostela, xunto cos grupos municipais do Partido Socialista (PSdeG), Compostela Aberta e Bloque Nacionalista Galego, fixeron público un comunicado no que rexeitan a actuación de Kaidy Kain na cidade, debido a que as "súas cancións son vexatorias e denigrantes para as mulleres".
Os diferentes grupos políticos aseguran que "un dos principais obxectivos do Concello de Santiago, no que existe un consenso maioritario, é fomentar os valores da igualdade entre homes e mulleres e previr a violencia de xénero".
Neste sentido, afirman que o concerto de Kaidy Kain é "contraria a estes valores, ás mensaxes que transmitimos, e ás accións que programamos coa finalidade de acadar a plena igualdade en todos os ámbitos: familiar, económico, social, educativo, cultural...".
Algo semellante fixo o Concello de Mos, que aprobou por unanimidade unha declaración para condenar o concerto que o cantante misóxino vai dar no concello durante a sexta feira.
