Ti es consciente. Identifica os riscos e evítaos con comportamentos seguros, dicía a campaña de publicidade que a factoría de Vigo da empresa PSA Citroën puxo en marcha co obxectivo de previr riscos laborais.
Na imaxe: unha muller, Ester Quintana, quen perdeu o ollo esquerdo polo impacto dunha bala de goma disparada polos Mossos D'Esquadra durante as mobilizacións da greve xeral do 14 de novembro de 2012 en Catalunya.
A campaña axiña tivo resposta nas redes sociais, onde se distribuíu o cartaz malia que a empresa, mediante un comunicado, sinala que a intención era mostrar esta imaxe "exclusivamente no interior das instalacións".
A avogada de Quintana, Laia Serra, confirmou nun xornal catalán que a imaxe fora usada sen consentimento e considerou que o acontecido é mostra "dunha falta de sensibilidade terríbel" pois a publicidade obvia que á muller lle dispararon un proxectil. Non semella a máis acaída para concienciar sobre "comportamentos inseguros".
"O centro de produción PSA Citroën de Vigo pide desculpas a quen puidera sentirse ofendido", sinala a declaración feita pública pola empresa. Confirma que todos os cartaces foron retirados das instalacións e recalca que "Citroën lamenta o malestar provocado".
Xornalismo de calidade e en galego, sen ti, sería imposíbel!
Facer un xornalismo crítico sen máis ataduras que as que nos unen á promoción e defensa dos intereses galegos precisa da túa colaboración. Subscríbete.