CIG-Ensino censura, aliás, que se fixe a duración dos concertos en seis anos cando isto só é preceptivo para o ensino privado e sinalan que, en facendo isto, a Xunta de Galiza vai máis alá da LOMCE na defensa do ensino concertado.
Dende o sindicato nacionalista afirman que a Consellaría está a realizar recortes sistemáticos, inxustificados e inaceptábeis no ensino público, suprimindo centros, unidades e profesorado mentres favorece os centros que segregan o alumnado por razón do seu sexo, publicamente vinculados co Opus Dei. Recordan ademais que estes concertos se mantiveron de xeito contrario á lei no seu momento.
Os colexios que segregan por sexo na Galiza son os centros privados concertados de Aloia, Las Acacias, Montecastelo, Montespiño e Peñarredonda.