Investigadoras e investigadores da Universidade de Santiago de Compostela (USC), a Universidade de Vigo (UVigo) e a Universidade de Aveiro (UA) presentaron hoxe un novo modelo matemático "fraccionario e compartimental" para estimar a evolución da Covid-19 tendo en conta as súas mutacións.
Trátase dun modelo que xa foi aplicado con éxito na análise dos casos da Galiza, Portugal, o Estado español e Europa. A chave desta nova metodoloxía, a diferenza das empregadas anteriormente, é que "permite incorporar a historia de todo o proceso, o denominado efecto memoria", segundo expuxo Juan José Nieto, catedrático de Análise Matemática da USC.
Nieto é un dos asinantes do artigo científico que esta terza feira foi publicado na revista Chaos, Solitons & Fractals para explicar en detalle o proceso. Xunto a el participaron Iván Area e Faïçal Ndaïrou, por parte da UVigo, e Delfim F.M. Torres e Cristiana J. Silva, da UA.
Previsións "pésimas"
Esta fórmula permitiu predicir o pasado 27 de decembro a tendencia no ritmo de contaxios por mor do impacto da cepa británica do virus.
"Co 56% máis de infectividade a curva subía moitísimo máis e moitísimo máis rápido, e xa nos permitiu anticipar que habería problemas nos hospitais", sinalaron os autores, que remitiron inmediatamente esta información á Comisión Europea.
As súas previsións de cara ao futuro son "realmente pésimas", debido á alta infectividade e letalidade das novas mutacións do virus.
"Os estados foron desconfinando con menor ou maior amplitude sen ter en conta que non era posíbel facelo aínda, e temos as consecuencias que continúan a día de hoxe", argumentaron.