As cidades do futuro: cara a unha xestión holística urbana

Unha cidade intelixente é un espazo urbano que, grazas a millóns de sensores (incluídas as persoas), é capaz de escoitar e comprender o que está a suceder en todo o territorio urbano e de tomar en cada momento as mellores decisións, proporcionando a información e os servizos adecuados á cidadanía. Esta continua evolución das cidades cara a sistemas cada vez máis complexos require coñecer o que ocorre nela e os efectos das accións derivadas da súa xestión. Ambas as variábeis teñen unha importancia vital para tomar, cada vez, mellores decisións. Os desenvolvementos tecnolóxicos posibilitan a provisión dun gran volume de datos procedente de diversos ámbitos e fontes de información. Con todo, para que tal cantidade de información sexa realmente útil para a toma áxil de decisións, requírese un profundo proceso de transformación nos costumes que temos en xestión urbana. O cidadán como centro do modelo Sen dúbida, o obxecto último de calquera Smart City é mellorar a calidade de vida do cidadán, tanto a nivel individual como colectivo, e para iso, a tecnoloxía debe ser capaz de escoitalo, entendelo e dar respostas con solucións concretas e adaptadas ás súas necesidades. Isto pasa por crear unha canle de comunicación directa e bidireccional, un proceso participativo entre a Administración municipal e os seus cidadáns a través dunha plataforma tecnolóxica ao servizo das persoas, contribuíndo a crear unha cidade intelixente a partir dunha cidade dixital. Humanizar a tecnoloxía para o seu achegamento á cidadanía e fomentar a participación municipal nunha dobre vía: 1. Creando na cidadanía o hábito de participar na definición da cidade e a toma de decisións. 2. Empapando as persoas raballadoras no eido público da cultura Smart, provocando a súa proactividade. Un novo paradigma O obxectivo dunha cidade intelixente, vai máis aló de dispor de ferramentas tecnolóxicas que faciliten monitorizar e xestionar. Deben ser capaces de resolver algúns dos problemas que se dan a diario nela. Isto significa que non só vai permitir obter, dispor, utilizar e xestionar cantidades inxentes de información e datos que xera a cidade, senón o deseño e a creación dunha estratexia metodolóxica que permita desenvolver un novo paradigma de xestión urbana, que é onde realmente reside a fortaleza innovadora dun proxecto destas características. Dos datos ao coñecemento Conseguir a posta en valor da totalidade dos datos por parte de xestores e cidadáns, ao procesalos e trasladalos a unha escala humana de entendemento e comprensión, permitirá extraer novas relacións entre os conxuntos dos devanditos datos, non evidentes en análises illadas, pero que se manifestan ao analizalos de forma conxunta. Estas análises, resultado da integración e procesamento dos datos nas diversas plataformas tecnolóxicas utilizadas, permiten achegar novas conclusións ás que as análises verticais non poderían chegar, é dicir unha xestión holística e integral da cidade, e é aí onde entran en xogo os patróns ocultos, é dicir, indicadores de cidade que detectan e extraen información en moitos casos non buscada de forma voluntaria por parte dos distintos axentes que xestionan a actividade dunha cidade. Así, por exemplo, poderíase coñecer o impacto real dun determinado evento que se celebra na cidade desde todos os puntos de vista: na mobilidade, no turismo, no movemento de persoas, no comercio ou no uso dos servizos urbanos. Trátase, pois, non de almacenar datos, senón de almacenar coñecemento para que este sexa independente das persoas. O impacto do evento comentado anteriormente quedará rexistrado e almacenadoo que permitirá mellorar de forma continua a organización e coordinación dos servizos municipais cando teña lugar outro evento de similares características. Este xerador de escenarios de simulación por parte dos devanditos xestores, permitirá coñecer os resultados previstos, positivos e negativos, das súas decisións e entender, dunha forma que até o de agora era imposíbel, os efectos das mesmas de forma global. Por exemplo, antes de tomar a decisión de cambiar o sentido do tráfico dunha rúa vai ser posíbel coñecer os seus efectos sobre o fluxo de tráfico en rúas adxacentes, sobre a eficiencia e puntualidade das liñas de autobuses, sobre o ruído que se vai a xerar ou o impacto comercial que vai ter sobre as tendas desa rúa. A toma de decisións está baseada, entón, non na intuición ou coñecemento parcial, senón nas evidencias e resultados que apoian ou desaconsellan esa decisión.