A confirmación de 65 positivos por coronavirus na residencia da terceira idade do concello do Incio devólvenos á realidade. Malia que ao longo dos gromos xurdidos no país nas últimas semanas confirmáronse varios casos en diversos centros de maiores, ningún deles acadou este alcance. Tanto é así que se atopan contaxiados oito traballadores e 57 usuarios dun total de 116, tendo xa falecido dous deles a consecuencia do virus. Así as cousas, segundo os dados achegados desde a Consellaría de Política Social á marxe dos 65 contaxios do xeriátrico do Incio rexístranse na Galiza outros 19 positivos, 11 dos cales son usuarios da residencia de Orpea en Culleredo.
O centro de maiores do Incio é propiedade do segundo operador de servizos de xeriatría da Galiza, a Fundación San Rosendo. A entidade dá emprego a máis de 1.670 persoas, dispón dun orzamento de 53,8 millóns de euros, declara 3.600 prazas asistenciais e conta con 67 centros, a maioría deles concentrada nas comarcas ourensáns, onde xurde o grupo baixo o patrocinio do bispado e o impulso do crego Benigno Moure. Moure é condenado en 2008 a cinco anos de prisión por apropiación indebida a unha muller con alzheimer ingresada nunha das súas residencias. A realidade da Fundación San Rosendo non se explica sen a relación de apoio mutuo co Partido Popular e moi particularmente co clan Baltar.
O gromo do Incio alértanos da situación de risco na que se atopan os usuarios dos centros de maiores. A mortalidade nas residencias de xestión ou titularidade privada suman 44,58 do total das defuncións producidas no país polo coronavirus, presentando unha porcentaxe de mortes moi superior aos centros públicos que malia a significar 22,8% das prazas da Galiza concentran 1% dos falecidos durante a pandemia. A maior letalidade nas residencias privadas está derivada da súa falla de medios, da precariedade dos servizos e do incumprimento da propia normativa, tal é como demostran as actas do servizo de inspección da Consellaría de Política Social. O drama acontecido nos centros de maiores de xestión privada só foi posíbel pola conivencia da Xunta da Galiza cos propietarios dos mesmos.
Seguemos nas mesmas
Á volta do mes de abril, coincidindo cos momentos máis duros da pandemia, o presidente galego comprometeu mudanzas no modelo de xestión dos centros de maiores. Así, Núñez Feixoo abriu a porta a un novo modelo asistencial para a terceira idade cun peso decisivo do sector público e apostou por obrigar aos centros privados a cumprir a normativa. Catros meses despois seguemos nas mesmas
