A Catedral de Compostela decidiu pechar as súas portas aos visitantes a partir das 12 horas do mediodía desta sexta feira, como medida preventiva contra o coronavirus.
A través dun comunicado, a Catedral informa de que non recibirá máis visitas "até novo aviso", pero as obras de restauración que se executen no interior da basílica "continuarán o seu normal desenvolvemento".
Esta medida adóptase sen data límite e "atendendo ás indicacións das autoridades sanitarias" para frear a expansión do COVID-19, xa considerado pandemia.
Isto supón un paso máis aló con respecto ás restricións adoptadas a principios de semana, cando restrinxiu o tradicional abrazo ao Apóstolo Santiago e retirou a auga bendita das piletas.
Ademais, segundo informan fontes das dioceses galegas a Europa Press, hai programada para este mesmo venres, ao redor das 11 horas, unha reunión dos bispos da Comunidade para abordar a crise do coronavirus, coa Semana Santa no punto de mira como próxima celebración relixiosa importante.
