Case 90% das enfermeiras eventuais do servizo de saúde público galego consideran a súa situación laboral “precaria”, por apenas 2,2% que consideran que non o é. É unha das conclusións da enquisa que o colectivo de Enfermeiras eventuais en loita realizou entre o 11 de marzo e o 16 de maio deste ano e que callou en 735 enquisas válidas. “Esta precariedade palpábel polos profesionais, sumado aos datos do INE do ano 2018, que sitúan Galiza na cola de España e moi lonxe de Europa na ratio enfermeira-doente (a terceira peor autonomía), non deixan a enfermaría galega nunha boa situación”, indican desde o colectivo.
A media de contratos asinados no último ano é de 24, superando os 300 contratos a persoa que máis número deles firmou.
O informe fornece dados de interese. Como que 78,7% das persoas entrevistadas levan nas listas 5 ou máis anos, e 44,4% 10 ou máis de 10 anos. De todas as enquisadas, só 19,2% ten unha vacante ou comisión fronte 80,8% que non a teñen. Os que si teñen vacante ou comisión, levan con ela unha media de 3,2 anos. Iso si, para conseguila tiveron que pasar 12,2 anos desde que sumaron o seu primeiro contrato no Servizo Galego de Saúde. A media de contratos asinados non último ano é de 24, superando os 300 contratos a persoa que máis número deles asinou.
Outros dados que proporciona esta enquisa de Enfermeiras eventuais en loita: 89,12% das persoas enquisadas foron mulleres mentres que tan só 10,9% son homes. 73,7% non teñen fillos e a súa media de idade sitúase nos 32,2 anos (sendo 21 anos a idade da máis nova e 54 anos a do máis maior).
“Que 89% das enquisadas se consideren traballadoras precarios está en relación directa coa baixa natalidade, sempre segundo dados da Comisión Europea, polo que, darlle fin á precariedade laboral da profesión enfermeira, poderá favorecer a natalidade galega, que recordemos, está a vivir un drama poboacional e necesita de 7.000 nacementos máis ao ano para volver medrar en poboación”, indica este colectivo.