O Concello do Carballiño superou esta terza feira a súa propia marca á hora de elaborar a tapa de polbo máis grande do mundo: nesta ocasión foron 515 quilos cortados en menos de 11 minutos, grazas a 30 polbeiros e polbeiras, sobre un prato de 5,37 metros de diámetro.
"Vós sodes os auténticos protagonistas", eran as palabras que lles dedicaba o rexedor municipal, Francisco Fumega, aos polbeiros durante unha homenaxe esta mesma semana lembrando que "sen eles non sería posíbel conseguir a declaración de Interese Turístico Internacional" que levaban anos perseguindo e que aprobou recentemente o Goberno estatal.
Pois "os auténticos protagonistas" encargáronse de que a auga estivese no seu punto, que non faltase o aderezo de aceite de oliva, sal e pemento e de cortar o cefalópodo polo que é coñecida a vila para ofrecer perto de 2.000 racións. A cita estaba convocada ás 19 horas, pero comezou unha hora máis tarde porque entre medias os polbeiros tiñan que prepararse para desenfundar as tesoiras con gran rapidez. E conseguírono.
Na praza do Concello, a trintena de picadores e picadoras comezaron a trocear o animal coas badaladas das oito da tarde, e co reto de baixar dos 11 minutos 7 segundos o tempo empregado, demostraron un xogo de boneca áxil para terminar ás 20.11 horas. Once minutos exactos.
"Vamos, aí está amontoado"
Entre centenares de persoas que se achegaron o máximo posíbel para poder albiscar a obra o único son era o das tesoiras, aínda que a ritmo de gaita e bombo, porque a banda de gaitas tampouco perdeu o convite.
Algunha exclamación dos propios polbeiros e polbeiras exixindo celeridade para tapar a madeira era o outro ruído. "Vamos, vamos, aí está amontoado", berraba un dos cortadores segundos antes de que a ovación do público marcase o final do evento.
Récord Guines de la tapa de pulpo más grande. 515 Kgr de cefalópodo.
Carballiño - OURENSE pic.twitter.com/3XmeoGMkio— Armando Doval (@Spunik3) August 9, 2022![Publicidade 195720]()
O polbo do Carballiño, único
Brazos en alto e o momento máis interesante para as persoas asistentes, o de probar o polbo do Carballiño. "Hai moita diferenza entre este e outros, co agarimo co que tratamos aquí o polbo non se trata noutros lados", aseguraba unha das polbeiras antes de mudar o papel e pasar de cortar a repartir o polbo entre os que se ían achegando co pequeno prato conmemorativo.
As colas chegaban varias rúas máis arriba, todo para conseguir unha ración de polbo, pan, viño, sobremesa e o emblemático prato de recordo por sete euros, para levar á casa un pedazo da 60ª edición da Festa do Polbo, a primeira coa declaración de Festa de Interese Turístico Internacional.
"Agora o reto é mantela", prevé o edil de turismo da vila, Manuel Dacal, quen lembrou que a tapa de polbo é o preludio "do día grande, o domingo, no parque municipal do Carballiño coa 'Festa do Polbo' que por fin regresa após a pandemia".
