As moitas posibilidades na Galiza de cara a unha alimentación máis sostíbel

Na nosa dieta tendemos a abusar da carne, mais o consumo en exceso deste alimento é malo para a saúde e tamén prexudicial para o medio. A gandaría extensiva contribúe significativamente ás emisións totais de gases de efecto invernadoiro, á deforestación e á contaminación da auga. Para evitar estas consecuencias é conveniente reducir o consumo de produtos de orixe animal, mais iso non significa deixar de alimentarnos correctamente. Algúns alimentos vexetais como a soia teñen case o dobre de proteínas que tería a mesma ración de carne. Este legume de orixe chinés consúmese en gran ou en produtos derivados como o leite de soia, o tofu ou a soia texturizada. Con este último conseguimos facer a alternativa vegana a un prato galego ben famoso: a zorza. Para consumir este derivado precisamos hidratalo antes e adobalo, xa que non ten ningun sabor de seu. O sabor da zorza dámosllo condimentándoa con allo, pementón doce e pementón picante. Outros legumes fonte de proteína e enerxía son os garavanzos ou as lentellas. O máis común é cociñalos en guisos pero son moi versátiles. Se os cocemos podemos empregalos como base para ensaladas ou incluso facer hamburguesas coas lentellas. Un prato con orixe en Oriente Medio, onde son grandes consumidores destes legumes, é o falafel. Faise con garavanzos crus e tritúranse xunto con cebola, allo e cenoria. Aderézase con especias, normalmente comiño, cúrcuma e pementa para logo fritilo con forma de boliñas, coma se fosen croquetas. Milleiros de posibilidades A enorme diversidade de verduras e hortalizas e os numerosos xeitos de cociñalas dannos milleiros de combinacións e posibilidades. Un exemplo pode ser unha pizza feita completamente con vexetais. Empregamos coliflor relada para facer a base e cubrímola cos ingredientes que máis nos gusten, neste caso tomate seco, champiñóns, pemento, cebola e alfábega. Algunhas froitas como o aguacate tornáronse moi populares nos últimos anos. Aínda que son moi saudábeis por seren ricos en vitaminas e conter graxas beneficiosas para o organismo tampouco debemos abusar deles, o ideal sería consumir sempre produtos de temporada e de proximidade, deste modo conseguiremos alimentos máis frescos e saborosos e un consumo máis sostíbel. En xeral, para que unha dieta vexetariana sexa equilibrada e nutritiva, ao igual que calquera outra dieta, ten que ser variada. Debe incluír todo tipo de vexetais como froitas, verduras, legumes, froitos secos ou cereais